做咗爸爸係唔同啲 老公做咗爸爸嘅6個轉變

由做女變咗做人老婆仲做埋媽媽，呢個心路歷程好微妙，同樣地對另一半嚟講，做咗爸爸之後都唔同咗，至於係變好咗定差咗，只能由老婆去評價。以下係唔少爸爸嘅6個轉變，同你老公似唔似？

1. 大男人變細心

自從BB出現後，老公都要幫手餵奶、換片，大男人面對BB都變得細心，成日怕粗手粗腳整親BB。結咗婚之後，老婆生日、紀念日未必好記得，又唔會好似以前咁大肆慶祝，但BB生日呢啲重要日子，老公係好記得！

2. EQ極速提升

BB有時又喊又扭，唔係肚餓唔係片濕，總之喊唔停，老公雖然唔知點算好，但都會盡力?BB，平時?老婆都冇咁好耐性。對住前世情人更加係一副冧樣，囡囡幾難搞佢都無怨無悔。

3. 出街考慮BB需要

以前兩個人出街輕輕鬆鬆，依家帶住BB出街，老公要諗清楚地點就唔就腳、有冇育嬰室、餐廳會唔會太逼擺唔到BB車⋯⋯BB大啲又諗有冇嘢啱BB玩，多咗好多考慮。

4. 去廁所愈來愈耐

老公平時去廁所打機、睇電話，搞一輪先出嚟，有冇發覺有咗BB之後老公去廁所更耐！因為湊BB攰，佢哋去廁所暫時離開吓，可以喺廁所抖一抖，有時抖到唔叫都唔出嚟。

5. 睇波要靜音

有咗BB老公繼續做球迷，但抱住BB瞓咗，電視唔可以開咁大聲，甚至要靜音。見到入球想興奮大嗌，都要掩住把口，費事嘈醒BB。

6. 大男孩瞬間變man

平時仲好似長唔大嘅老公，做咗爸爸之後突然man咗好多，可能知道責任重咗，負擔大咗，要肩起照顧一家大小嘅重任，做嘢交帶咗，好似比以前更可靠。

Text: Mami Editorial