研究發現同一時間畀過多玩具幼兒玩反而會抑制幼兒創造力

By rachel.lo on 04 Oct 2018

小朋友常常貪新忘舊？明明手裡拎住一件玩具，但玩一陣就玩厭要拎另一樣玩具？咁有可能就係小朋友擁有太多玩具而容易分心嘅緣故！美國一間大學早前就小朋友同玩具嘅關係做咗一項研究，發現擁有較少玩具嘅小朋友比起較多玩具嘅小朋友更能夠專注玩耍，而且仲可以創造出更多玩法，玩得更開心！

研究人員搵咗36名幼兒，分兩批人，分別給予4個同16個玩具，然後請佢哋喺遊戲室內獨自玩半個鐘。研究人員發現擁有16種玩具嘅幼兒，喺玩某一個玩具嘅時候，會經常望向其他玩具，令注意力分散而無法持續玩同一個玩具；至於只有4個玩具嘅幼兒反而更專注玩手上嘅玩具，甚至有啲玩具可以玩2次以上，過程中更可以發揮出創意，自創出各種玩法，玩得不亦樂乎！

所以爸爸媽媽喺小朋友玩玩具嘅時候，唔需要一下子將一大堆玩具攤放喺小朋友面前任由佢哋揀選，因為太多選擇反而會令小朋友心思思想玩下呢樣、又玩下嗰樣，容易分心；反而只有少量玩具可以刺激到小朋友天生嘅好奇心，會願意更深入探索同鑽研玩具嘅各種可行嘅玩法。爸爸媽媽只需要定期為小朋友輪流更換一啲玩具，就可以令小朋友發揮創意！