媽媽之間究竟點解會傾極都傾唔完？原因只有一個，BB太重要，佢地嘅事值得一講再講。

媽媽們之間有太多可以分享嘅經歷同埋資訊，真係三日三夜都唔會傾得完。由陀B開始搵醫院講到BB大左搵幼稚園搵小學，由陀B時自己食啲咩好，BB食人奶定奶粉好，到小朋友嘅營養飲食，話題真係數之不盡。以下幾樣相信都係媽媽最鍾意傾嘅事。

1. 陀B趣事、難忘事

媽媽最鍾意同其他媽媽講番陀BB嘅時候發生過嘅趣事同難忘事。因為只有陀過BB嘅媽媽，先會真正明白嗰種感覺。無論係BB踢自己個肚皮嘅奇怪感覺、懷孕引起嘅坐骨神經痛、又或者肚皮脹到睇唔到腳趾嘅鎖碎事，最後都成為媽媽心目中，難忘可貴嘅回憶。

2. 生B經歷

生BB嘅過程，對於每個媽媽黎講，都係人生中一個好特別，甚至最特別嘅經歷。入院時間同過程，待產經過，到到BB出世嘅嗰一刻，都係媽媽心裡面又特別又難忘嘅。

3. BB用品分享

由尿片到衫褲鞋襪，由奶咀奶樽到安撫公仔，由沖涼液到濕紙巾，種類同款式都有好多好多，淨係揀幾樣傾下，都已經夠傾大半日。

4. BB食咩好

媽媽最關心嘅點少得BB嘅飲食，由母乳、奶粉、糊仔，到固體食物，再到簡單嘅粥仔同埋飯仔，媽媽們互相分享，互相學習。佢地傾計絕對唔係為左解悶，其實係交流心得。

5. BB嘅無聊日常

BB嘅所有事，對於媽媽黎講，都係珍貴嘅重要事。要分享呢類軼事，當然要搵番媽媽做對象，大家先會啱傾。

鍾意嘅事，講一百次都唔嫌多，有關自己最心愛嘅小寶貝嘅事，媽媽傾唔完，係十分正常嘅。

Text: Mami Editorial