爸媽隨時隨地都會為小朋友影相留念，整理咁大量嘅相片，真係一啲都唔容易。

爸爸媽媽嘅手機入面都載滿仔囡可愛嘅相片，大家除左得閒㩒返出黎睇吓之外，有無好好整理一吓佢地？不如睇吓以下嘅任務係已經完成，定係扔埋左一邊？

1. BB嘅100天相片紀錄

見過有爸媽好有心機，由BB出世第一日開始，每日都最少同BB影一張相，影足100日，為BB記錄每天嘅長大同變化。影一張相看似好簡單，但係喺照顧住一個初生BB咁忙亂嘅時間，每日都要影，其實唔係咁容易。

2. 揀相整相簿

另外，一個更加艱巨嘅任務就係整相簿喇。相簿有兩種選擇，有啲網上服務，將相片上載，然後排好每一頁嘅相片位置，就可以比錢成本列印出黎，寄到去屋企。另外一種就係傳統相簿，將曬好嘅相自己編排放入相簿。

無論係邊一種，都要好有心機先能夠完成，爸媽們，加油呀！溫馨小提示，如果係整自己入相嗰種相簿，曬相嘅時候可以揀列印埋日子，會方便好多呀！

3. 做好檔案嘅備份

備份好重要，小朋友天天長大，每一張相，每一個短片，都係獨一無二又影唔番嘅，而會曬出黎嘅相，通常都只係其中一小部份，所以就算幾忙都好，都應該定期做檔案備份呀。爸爸媽媽，你地有無做備份呀？

上面提到嘅三個任務，爸媽都有完成嗎？不停為小朋友影相之餘，仲要曬啲相出黎同埋做備份呀。

Text: Mami Editorial