download MamiDaily 親子日常 app
夫妻金錢觀唔同易失感情 3個態度輕鬆談金錢

夫妻金錢觀唔同易失感情 3個態度輕鬆談金錢

家庭關係
By rachel.lo on 26 Sep 2018

即使係夫妻,一講到錢嘅話題,如家用開支、水電煤用度、交通洗費、孩子學費⋯⋯往往難免會有出現氣氛緊張嘅時候。如果雙方嘅金錢價值觀唔一致,如一方認為應多花費喺孩子嘅課外活動,另一方認為應多作投資,好容易會認為對方「唔識諗」而出現拗撬,影響感情。既然大家已成為一家人,不妨喺商議錢銀洗費嘅時候,抱持以下3個態度,化解緊張氣氛。

shutterstock_753311653

1.了解彼此金錢觀

夫妻間有一致嘅金錢觀當然係最好,但夫妻始終係兩個個體,成長背景唔同,金錢價值觀同消費模式亦可以係截然不同。最常見嘅夫妻為錢爭拗嘅原因係一方認為賺錢要活在當下、好好享受生活;而另一方就認為要為將來打算、積穀防飢,唔願意喺此刻大灑金錢只換一刻享受,呢兩種唔同嘅價值觀最易成為令夫妻終日爭吵嘅導火線。

shutterstock_1132190888

千祈唔好諗住將對方嘅金錢觀扭轉到要同自己一樣,因為基本上係冇咩可能!反而夫妻兩人可以嘗試調整自己嘅價值觀,其同制定每月嘅儲蓄同開支,當夫妻都認同每月嘅儲蓄額可以應付日後嘅生活,不妨喺開支嘅項目中撥一筆錢,容許大家去一個小旅行或睇一場電影,適時享受一下生活。

shutterstock_315931409

2.尊重彼此私隱

有咗小朋友後各項開支會大增,夫妻二人都可能要將每月嘅收入全面上繳,分配喺各項家庭開支中。不過夫妻間亦有偷偷收埋私己錢嘅時候,當被對方發現時難免亦會鬧不快。婚姻中需要坦誠嘅同時亦需要私隱,存有私己錢嘅一方不妨大方向對方坦誠:「上個月有錢洗剩,所以我將啲錢儲起咗,第日可以買好啲嘅禮物畀你同BB。」半透明半公開嘅做法畀另一半知道你尊重佢,佢亦會放心唔會再深究你瞞住佢私下儲咗幾多錢。將心比心,你亦應該尊重另一半嘅金錢私隱,令雙方都保持一定程度嘅金錢自由同隱私。

shutterstock_44998534

3.訂立其同目標

每個家庭都應該有一個共同目標,如買車、買樓、移民等。而呢個目標應該係由夫妻二人共識所擬定嘅目標,而唔係一個人單純決定去迫另一半遵從。喺設定目標後,夫妻二人都會心甘情願撥出一部分薪金出嚟實踐呢個目標。

shutterstock_181040873

Text: Mami Editorial

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道