做左媽媽，要照顧BB一定少左好多時間，以前最注重嘅事，依家都變得無所謂。

少女最鍾意扮靚，媽媽就最鍾意同仔囡扮靚。少女最鍾意甜品，媽媽就最鍾意為小朋友整甜品。媽媽不知不覺咁將自己大部分嘅時間用喺仔囡身上，連自己以前一定要做嘅嘢，都變成唔一定喇。

1. 化妝

好多媽媽因為坐月時，唔洗出街，同埋為左唔想初生BB成日黐到媽媽啲化妝品，都會唔化妝。坐完月，可能習慣左，又覺得BB仲細，有啲媽媽就開始覺得唔需要化妝。就算仲係鍾意打扮嘅媽媽，因為時間關係，好多時都只係簡簡單單咁搽上最基本嘅化妝品。

2. 整指甲

好多女士都鍾意搽指甲油同埋整Gel甲，見到靚靚嘅指甲真係個人都開心啲。不過，好多媽媽都覺得整嘢食比BB食嘅時候，雙手要掂到啲食物，有指甲油嘅話唔安心，又唔方便，所以唯有唔搽喇。

3. 敷面膜

少女嘅時候最著緊啲皮膚，無一個禮拜三次，都至少一個禮拜一次嘅敷面膜，媽媽們，記唔記得上一次敷係幾時呀？

4. 戴飾物

襯衫唔少得嘅飾物，一黎怕BB當係玩具，伸手去扯，二黎始終多一樣嘢又無咁方便，三黎就係無時間。我估好多媽媽平日出街，最多只係戴隻手錶。

5. 行街買衫

無論係全職媽媽，或者在職媽媽，都唔夠時間去商場行街買衫，改為網上購物，佢地已經好少真真正正咁去商場慢慢行慢慢揀。

最近，大家都提醒媽媽們應該要有「Me Time」，照顧小朋友嘅同時，都要好好照顧自己，要有自己嘅時間同興趣。自己叉足電，先有足夠能量去照顧小朋友。所以就算幾忙都好，都要為自己預留屬於自己嘅時間，做自己鍾意做嘅事呀！

Text: Mami Editorial