BB滿1歲 同大人食飯要注意5件事

當BB滿1歲，腸胃功能已經發展得同大人差唔多，終於可以開始同大人一齊食飯喇！BB可以每日都食早、午、晚三餐正餐同2次茶點，正餐方面可以嘗試食少少調味料，不過爸爸媽媽仍要注意下面5件事。

1. 畀BB試食家人食物

BB可以慢慢開始習慣食大人食物，但要以少調味、低鹽為原則，食材亦要健康、新鮮，令媽媽可以慳返額外準備BB食物嘅時間。

2.每日同家人一齊食2餐正餐

爸爸媽媽需要重新制定BB嘅進食時間表，每日應有3餐正餐同兩餐茶點，其中兩餐正餐應畀BB同屋企人坐埋一齊食，令BB有融入家庭進餐嘅感覺，可以模仿家人進食嘅模式，亦可以好好享受食飯時同家人嘅交流同互動。

3.提供全穀食物

穀類食物可以進一步訓練BB嘅咀嚼能力，又可以令BB吸收更外碳水化合物、蛋白質同維他命B等營養。

4.提供茶點

喺BB食完正餐嘅2至3個鐘後應餵BB食茶點，以維持熱量。BB嘅茶點可以係水果、奶、果汁等，但要記得BB每日唔可以飲多過120 ml果汁。

5.仍要飲奶

BB每日仍然需要飲2至3次奶，爸爸媽媽可以喺茶點時間為BB提供奶或奶類製品，配合麵包或水果。如果BB鍾意食固體食物多啲，可以一日飲2次奶；如果較鍾意飲奶，每日最多飲3次奶。如果BB飲太多奶，會影響BB食固體食物嘅份量，所以BB每日嘅飲奶量應控制喺360至480 ml。

Text: Mami Editorial