產後危機 3大地雷令夫妻關係變差

「有咗小朋友之後，同老公好似只剩下孩子嘅爸媽關係，而戀愛嘅感覺近乎零。」拍拖、結婚、生兒育女⋯⋯原以為呢三步曲係同另一半不斷尋求幸福嘅過程，可以更鞏固彼此間嘅關係。偏偏好多夫婦喺BB出世後，先發現原本甜蜜嘅二人關係不再，取而代之嘅係終日不斷為湊小朋友嘅瑣碎事抱怨同爭執。當愛情悄悄被磨滅，夫婦亦喺呢段關係中感到疲倦，為咗減少磨擦而減少溝通，令婚姻關係岌岌可危。

點解有咗小朋友之後，夫婦間會成日起衝突？其實主要係由呢3個原因引起：

1.休息唔夠

初生BB出世後，父母要24小時全天候照顧BB，同以前可以隨意揮霍私人時間嘅日子截然不同。初生BB需要隔2至3個鐘飲奶、掃風、換片⋯⋯加上初生BB經常不分日夜無故哭喊，令父母每日都疲於奔命。喺欠缺休息下，雙方嘅情緒都變得好差，壓力亦非常大，少少刺激都足以令情緒大爆發。

2.失去自由

爸爸媽媽要將所有時間都投入照顧BB，所有社交、娛樂都要暫時捨棄。每日嘅生活不外乎返工同湊仔，兩樣都係爸爸媽媽主要嘅壓力來源，偏偏就冇途徑可以抒發壓力，鮮少有自由去做自己想做嘅事。但當發現對方有時間去娛樂而自己冇嘅時候，會認為對方只顧自己玩樂，覺得自己好委屈。

3.家務分工不均

一個家庭嘅家務繁重，每項家務都會增加爸爸媽媽嘅疲累感，所以當家務分工不均嘅時候，被分配較多工作嘅一方（通常係媽媽），會覺得兩人都有同等嘅責付去為家庭付出，認為自己獲得更多工作量而覺得唔公平。當自己為家務而忙個不停，而另一半就游手好閒，更會認為對方都將工作拋畀自己，又唔幫手減輕自己嘅工作，因而敵視對方。

其實有咗小朋友後，生活不如二人世界嘅簡單自由，無論爸爸定媽媽都一定會多咗好多壓力，雖然上述嘅情況好難避免，但夫妻間亦可以常存同理心，設身處地考慮另一半嘅處境，多關心、多慰問、多幫手，畀另一半知道你係戰友，而唔係敵人。

Text: Mami Editorial