初生BB先有嘅5個反射動作 爸爸媽媽見過幾多個？

初生BB唔單止喺結構上同大人唔同，原來仲有好多大人都冇嘅特殊反射動作！呢啲反射動作都係大腦皮層未發育成熟嘅暫時表現，會隨著BB長大而逐漸消失，呢5個反射動作爸爸媽媽又有冇見過呢？

1. 抓握反射

將手指或小物件放入BB嘅手掌嗰陣，BB手掌會緊緊握實；但輕掂BB嘅腳掌時，BB嘅腳趾就會向內緊縮。

2. 吸吮反射

當有嘢放入BB口中，BB就會噘起嘴巴，進行吸吮嘅反射動作，呢個係BB攝食嘅本能反應，令BB一出世就能夠吸奶生存，而呢個反射動作會隨著BB長大而轉變為自主動作。

3. 尋覓反射

當手指或媽媽嘅乳頭掂到BB嘅臉頰或嘴巴周圍時，BB就會將頭擰向手指或媽媽乳頭嘅方向，可能會出現張嘴或吸吮嘅動作，呢個係一個重要嘅求生本能，令BB可以搵到食物。

4. 驚嚇反射

將半坐臥嘅BB輕輕向後推而令佢失去平衡時，BB會突然展開雙手向外伸，手掌攤開同拱起背部。

5. 抬步反射

當BB嘅腳底掂到地面或床邊嘅時候，BB會自然抬起腳，做出好似爬樓梯嘅動作，表示BB嘅感覺同運動神經元功能正常。

爸爸媽媽要注意，由於初生BB非常脆弱，千祈唔好貪得意而自己隨意為BB做驚嚇反射同抬步反射嘅測試，因為BB嘅骨骼尚未發育完全，有機會令BB受傷！當BB到咗大約3至4個月大去健康院檢查嗰陣，會由兒科醫生進行測試。

Text: Mami Editorial