陀住BB條腰赤赤痛 3個簡單動作紓緩懷孕期腰痛

懷孕中嘅媽媽，隨著肚愈嚟愈大，腰部肌肉會因為要承受重量而容易出現腰痛問題。但就算覺得辛苦，孕媽媽亦唔可以隨意食藥，怕會影響腹中嘅胎兒。其實懷孕間腰痛嘅主要原因係背肌衰弱，所以各位孕媽媽可以透過下面3個簡單嘅伸展動作鍛鍊背肌，改善腰痛。

1.旋轉腰部

呢個動作可以放鬆腰部肌肉。

先平瞓喺床上，雙手大字型展開，雙膝彎曲，腳掌平放喺床上；維持上身唔郁動，雙膝向右側轉直到貼喺床面；再反方向做一次。

2.挺胸壓臀

呢個動作可以加強下背部肌肉，減少臀部同腰背痛，亦對緩和韌帶痛有幫助。

跪坐喺地上，再雙手撐地，雙手同雙腳距離要同肩膊闊度一致，背部伸直；然後頭向下內縮，直到望到肚臍，一邊慢慢吐氣，一邊捲曲背部；之後緩緩將頭抬起望向天花板，一邊吸氣，一邊將背部向後仰，伸展腰部。

3.抬屁股

呢個動作可以加強腰背、腹部同臀部嘅肌肉，亦有助於緩和骨盆和下背部痛。

先瞓喺地上，彎曲膝頭，將雙腳平踩喺地面上，張開雙腳距離至臀部嘅闊度，雙手放喺身體兩側，手掌貼著地面；然後一邊慢慢吸氣，一邊抬起臀部、下背、中背同上背；再吐氣，慢慢將背部降落到地面。

Text: Mami Editorial