【BB要加固 應該行BLW定食糊仔？除左睇bb意願 媽媽心態都好重要】

先同大家講一下個背景先，我個女小恩恩已經6個半月大，加固左一段時間，係呢加固呢段時間，真係做左好多功課！畢竟大家都知有分糊仔同BLW，希望同一個過來人嘅經歷，比大家了解一下行點先知bb岩唔岩行BLW / 糊仔！

首先講左BLW先啦。BLW都係一種好新嘅方法，BLW＝Baby Led Weaning，係嬰先主導斷奶嘅方法，呢個方法係會Skip左食一啲糊狀食物，直接比bb食一條條手指Size嘅食物。雖然bb未出牙，但啲牙已經係晒牙肉入面，其實係有足夠嘅力去咬。而且係可以訓練到bb口腔、手指肌肉同眼部協調。網上做research都會發現BLW係有超多好處，但其實未必係個個bb都適合。（每個bb都有適合自己嘅方法，我相信無一種方法係完美地可以應用晒係所有bb）

適合行BLW嘅bb | 相反就係適合糊仔嘅bb（個人經驗之談）
1. 好中意拎住d玩具放入口，對新事物好有興趣，好願意去試
2. 坐係high chair都肯拎下枱面嘅野，唔會話拎都唔想拎（有啲bb真係真係會懶豬豬，唔肯自己拎）
3. 體重係正常範圍內，因為行BLW係需要一段長時間比佢學習吞嘅過程，怕太輕嘅bb會錯過左吸收營養嘅黃金機會，始終糊仔係真係確保到佢有食，同埋初初行BLW可以食到嘅食物都比較少，怕過輕嘅bb吸收得唔好～

除左bb適唔適合，媽咪嘅心態都好重要！因為我行BLW都行到有啲壓力，如果媽媽們本身係好易緊張、返工好忙、屋企人反對等，都會令你壓力增加。初初行BLW，小恩恩係去到第3個星期先真係識吞，呢3個星期個心情真係好煎敖。因為真係怕佢係屬於唔岩行BLW嘅bb，又擔心佢吸收唔到鐵質，總之就好多位都會擔心！所以真係建議心情比較放鬆嘅媽媽先好實行，如果唔係真係會好大壓力 :(

相反，糊仔都有佢可取之處，畢竟bb一開始係食奶，係流質食物，突然要佢Skip左流質嘅過程，bb都可能唔太習慣～所以糊嘅好處就可以比bb慢慢學習同進步。又可以確保到佢係有野落肚。對比起BLW又無咁易整到周圍都係食物，對於比較忙嘅媽媽係舒服好多，可以洗少啲野！而且相對上老一輩嘅人亦較少反對，減低衝突機會。

最後，想比多小小Tips，如果真係想搵下bb適合邊種方法，建議可以先試BLW，萬一發現自己心情同bb都唔太合適，再轉糊仔都未遲！畢竟BLW強調，bb係先學咀嚼再學吞，糊仔正正相反。大多數人都怕bb食慣糊仔慣左吞，突然轉BLW佢唔咀嚼直接吞就會硬親。但當然BLW轉糊仔就無問題，所以都建議大家真係要試方法，就先試BLW～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos: 90後P牌媽咪

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！