BB忽然飲極唔飽 原來係急速成長期

明明BB戒咗夜奶，忽然間半夜喊醒又扭飲奶？平時BB隔3個鐘先飲奶，而家先2個鐘就咁快餓？好多時BB嘅忽然轉變都會令爸爸媽媽好擔心，但原來BB忽然奶量大增，係因為經歷緊「急速成長期」呀！

細心嘅爸爸媽媽可能會發現，BB有時會一晚瞓醒就會變大隻咗，唔好以為係錯覺呀！而係BB嘅生長並唔係慢慢直線長大，而係會忽然快速長大！一般嚟講，BB會經歷幾次急速成長期，通常會喺BB 3周、6周、3個月同6個月大嘅時候發生，但實際情形因人而異，而經歷「急速成長期」嘅BB都會有以下嘅特徵：

1.食極都唔飽

平時嘅飲食時間表完全打亂晒，BB呢頭飲完奶，轉過頭就覺得肚餓又要飲奶。BB嘅生長速度加快、新陳代謝亦很快，需要更頻繁嘅餵食，因為佢哋正建立緊脂肪、肌肉同骨骼。

2.睡眠習慣改變

有啲爸爸媽媽會發現BB瞓多咗或少咗，咁係因為生長激素會影響BB嘅睡眠習慣。

3.脾氣好差

因為BB嘅身體正急速成長中，肌肉同肌腱都會快速伸展，可能會令BB覺得疼痛，而經常性嘅肚餓感得唔到滿足，亦會令BB覺得好抆憎。

Text: Mami Editorial