媽媽的每個小小愛心行為，都令小朋友成為幸福嘅小寶貝

除左拖住佢哋嘅小手，攬到佢哋實一實，同埋錫錫，其實平時媽媽仲有好多愛心行為，我地一齊黎數吓。

 1. 幫小朋友整理衫褲

媽媽細心溫柔咁幫仔囡整理好衫領同褲腳，係一個好溫馨嘅場面呀。

2. 摸下小朋友頸背

有冇發現好多時都見到媽媽佢地摸吓小朋友嘅頸背呢？原因有兩個，頸背嘅冷暖可以令媽媽知道小朋友夠唔夠暖，需唔需要加著外套。另外，喺炎熱嘅夏天，小朋友好容易出汗，媽媽其實係睇吓小朋友需唔需要抹汗、換汗巾、或者換底衫。

3. 整理小朋友嘅頭髮

好多媽媽都鍾意用手輕輕掃下、整理下小朋友嘅頭髮。除左想幫佢地掃番整齊啲頭髮之外，我覺得摸下佢地啲頭髮同埋頭，有種好溫暖窩心嘅感覺，唔知有無媽媽同我一樣諗法呢？

4. 搽防曬產品

一提到戶外活動，媽媽梗係最緊張「搽防曬」喇。幫小朋友搽緊防曬嘅媽媽最溫柔。

5. 準備防蚊措施

相信唔少媽媽幫佢地嘅仔囡搽防蚊液或者貼防蚊貼嘅時候，一邊會心諗「要咬就咬我好喇。」。呢種犧牲嘅準備，係母愛呀。

Text: Mami Editorial