最接近死亡嘅一刻 孕媽媽身處產房嘅3個恐懼

老一輩經常會話：「女人生仔，係以命搏命。」好多媽媽喺步入產房之前，可能都對呢句說話不以為然。然而，喺進入產房之後，成間房都迴盪住女人們同自己嘅痛苦慘叫聲，伴隨著身體傳嚟一波比一波愈發強烈嘅劇痛，彷彿身體要被撕開一樣。呢一刻會覺得，原來自己係可以離死亡咁近。

1.怕痛

陣痛係子宮頸由1度開到10度嘅過程，沒有最痛，只有更痛！就算入咗產房，都需要等到子宮頸10度全開、穿羊水、BB開始見頭⋯⋯子宮頸愈擴張，媽媽要承受嘅痛楚就愈大，偏偏媽媽喺每一刻都覺得已經到咗痛楚嘅極限，笑氣都變成可有可無嘅存在，永遠預知唔到痛楚嘅極限令媽媽感到好絕望同無力。

2.怕死

經歷長時間嘅痛楚，無論用幾多次力，BB都仲未出到嚟⋯⋯媽媽呢個時候已經攰到筋疲力竭，仲開始有啲意識模糊，同時受到痛楚同疲憊嘅煎熬，令媽媽開始擔心自己未生到BB出嚟就已經死咗。

3.怕BB有事

當媽媽無力氣生BB，醫生察覺到有危險時，會用各種工具將BB強行拉出嚟，如用產鉗或吸盤，將BB個頭鉗或吸出嚟，呢啲方法雖然可以輔助BB，但同時亦可能會傷害到BB，令媽媽非常擔心BB之後會有後遺症。

每個BB都係媽媽用生命做賭注搏返嚟嘅禮物，爸爸或者唔會明白，亦永遠唔會體會到媽媽喺生產過程嘅恐懼，但請好好感激身邊嗰位願意以身犯險、換取美滿家庭嘅另一半。

Text: Mami Editorial