唔好以為爸爸冇產後憂鬱 5句說話好傷新手爸爸嘅心

媽媽產後抑鬱就聽得多，但其實產後抑鬱嘅爸爸都唔少！雖然十月懷胎陀BB嘅唔係佢哋，但嗰十個月佢哋都有盡心盡力服侍好孕媽媽，滿心期待BB出世。但BB出世之後，無奈爸爸嘅侍產假係得幾日咁少，好快就要返去職場繼續拼搏，照顧產後媽媽同BB嘅時間相對大減。當爸爸終於放工即時衝返屋企，點知聽到下面呢5句說話，真係眼淚只能在心裡流～

1. 唔得閒理你！

返到屋企想向老婆打聽下BB今日咩情況，或者有嘢想同老婆分享下，點知就畀忙著餵奶嘅媽媽成盆冷水兜頭淋，都咪話唔灰！其實媽媽產後因為受到荷爾蒙影響，加上身體未復原又忙著照顧BB，事事要將BB放第一位，所以個人成日都會好燥好火爆！爸爸可能會因為咁而覺得自己備受冷落，下次放工可以試下先攬一攬媽媽，重奪返媽媽嘅視線，關心完媽媽先到BB，再順便幫手洗下奶樽、做下家務，咁應該可以得到返媽媽嘅關心回應。

2.你都唔錫BB嘅！

有時想篤下電話、去廁所辦大事⋯⋯可能時間長咗些少，然後就會聽到身邊人爆咗句咁嘅嘢出嚟，好多時爸爸都會一頭霧水，再望一望媽媽手上嘅BB，心諗：我做錯咗啲咩？其實媽媽呢句說話都只係想爸爸同BB玩下、餵下奶，向BB表達下愛意，等BB都知道下有爸爸呢個照顧者。但爸爸呢刻就可能會覺得好委屈，明明上一刻先同BB玩完，或諗住一陣先同BB玩，真係「冤枉呀！大人！」。

3.你咩都唔識做！

當爸爸返工之後，會比較少參與BB嘅照顧工作，可能媽媽有急事要行開一陣，想請爸爸幫忙同BB沖涼或著衫。爸爸接過BB之後個腦就會空白晒，心諗：BB應該喺邊沖涼？啲衫係點著？ 到媽媽返嚟嘅時候，見到爸爸仲係抱住BB咩都未做，就會發脾氣話爸爸咩都唔識，而爸爸就會覺得「平時又唔係我做？我點會識？」建議爸爸放假時都可以參與下呢啲照顧BB嘅工作，除咗可以同BB增進下感情，下次亦可以好MAN咁向媽媽炫耀「BB鍾意我同佢沖涼呀！」

4.人哋老公真係好！

通常媽媽講呢句，都一定係因為有嘢想呻，可能想爸爸都幫手做下家務、照顧下BB或哄下老婆。但10個男人有10個聽完之後都會即刻嬲咗，而唔會思考媽媽呢句說話嘅背後動機，好多時心裡只會反駁：人哋老公咁好你又唔嫁畀人？ 始終人比人比死人，仲要同人哋老公比，係男人都覺得冇晒面同自尊心。

5.好攰呀！唔好搞啦！

男人都係用下半身思考嘅生物，有時情到濃時想同老婆親熱一下，點知就畀呢個理由狠狠拒絕，雖然心痛老婆照顧BB係好攰，但更心痛自己成為冇人照顧嘅可憐蟲！建議爸爸可以幫媽媽分擔部分家務，畀媽媽可以休息一陣再照顧爸爸嘅需要。

Text: Mami Editorial