download MamiDaily 親子日常 app
【魚媽之人奶路分享醫院篇】

【魚媽之人奶路分享醫院篇】

爸媽分享
By Hey!魚媽媽 on 31 Aug 2018

我相信好多媽媽都希望可以母乳餵哺,比BB最好既營養,但呢樣真係要天時地利人和。喺魚魚出世之前,我已經決定先試母乳餵哺,唔成功就用奶粉代替。


喺孕期入面我同魚爸都有出席大大小小既產前講座,但聽完都係唔記得,好快魚魚比預產期早左11日出世,喺38週3穿水催生順產。
我係選擇公立醫院(東區尤德那打素),BB一出世助產士已經抱佢埋我身做肌膚接觸,一路幫手教BB吸啜初乳。

shutterstock_695265856

老實講,個下我覺得咩都啜唔到,不過就跟姑娘做,推完胎盤,聯好針就推上產後病房,休息左大約一個鐘BB就推左黎比我啦!
東區醫院推行母嬰同室,可以日夜望住BB個心真係好定。

母乳餵哺係唔需要睇時間,ANYTIME BB需要就埋身比佢食,係醫院定時定侯姑娘會入黎睇你餵成點,睇下BB識唔識啜。
同埋教你睇尿片睇BB食唔食到奶。
第一日魚魚係唔多識啜,攪黎攪去都食唔到D咩,可能因為肚餓仲係咁喊。姑娘有問我想唔想補奶比BB,我當時想繼續試就話唔需要,
仲不停飲魚爸煲既黑豆水希望上到奶。

shutterstock_1105817678

第二日我仍然努力地埋身,希望BB可以啜多D奶,到下午換片,發覺魚魚小便有D橙色,搵姑娘就話BB有小小脫水。
個一下我都未識驚,依然無補水奶或奶粉,繼續埋身。
到左夜晚有個資深姑娘入黎話幫我手擠奶,希望可以比到BB食,姑娘一擠竟然有30ML。佢就即時幫我餵BB,個晚BB真係喊小左,因為佢終於有飽奶食啦!

到第3日醫生巡房話媽媽可以出院,但BB因為跌磅11% ,所以唔可以出院住。
當時我話要留低陪個女,醫生無阻止我,當日姑娘就開始教我用泵去泵奶,個時其實已經漲到好痛,成個石頭胸,掂下都標眼水。
好不容易泵到30ML,拿拿聲比BB食,再見到BB條片開始濕,我就開始埋身之後再泵比佢。

 

第4日早上,一早就有個姑娘黎幫我通乳頭,姑娘摸下我個胸,佢意思係奶有好多,但唔夠出口出奶,要幫我開窿出奶,個下好驚,但為左BB點都要頂,成個過程係用人手不斷係乳頭好用力擠,真係痛到想嗌出黎!

shutterstock_506771125

但確實通完之後我既奶出得順好多,而BB亦開始識得啜奶。

到第5日醫生巡房話BB上番磅可以出院啦!當日下午就同BB一齊番屋企繼續我既餵奶生活。

喺我生BB呢幾日好多謝東區醫院8樓產科既姑娘,無你地幫我,我唔會可以餵到母乳,其實公立醫院都唔錯架。

醫院編就係咁多啦,黎緊會分享東區醫院生產記,母乳生活,產後抑鬱等⋯⋯係好多眼淚既。

總結:
不論母乳或奶粉,都係對BB好既,作為媽媽盡力就可以。
唔好好似我咁BB橙尿都唔比佢補奶(內疚到依家)
同埋初生BB好多都有黃疸,係需要多飲奶多排尿先可以退黃。
今日補左奶粉唔代表唔可以再餵人奶,各位媽媽加油呀

==============================

Text:Hey!魚媽媽

Photos:Shutterstock

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道