【唔好咩都加把口試下體諒同諒解新手媽心情其實新手媽媽真係好需要支持同鼓勵】

By 西瓜媽媽 on 27 Aug 2018

懷胎十月終於係今年7月初我既小西瓜終於出世嚕除左一邊學習照顧小西瓜仲慢慢學做一個合格好媽媽！

今日係西瓜妹出世27日因為老公家人同老公本身係瘦底同細粒而西瓜妹正正遺傳左依一點,明明24週照結構仲話足月會有7磅以上,但到後期完全唔長胎到西瓜妹出世佢重2.86kg 6.3磅係醫院角度睇其實重量合格,但係係家人朋友眼中西瓜妹太細粒。。。

*唔好餵人奶餵奶粉啦

係醫院生完西瓜妹好努力不停飲水飲炒米茶每餐食到有咁飽得咁飽等自己快d上奶,係醫院頭3日西瓜妹好叻啜唒d黃金初乳第4日已經係白色奶奶，但因為細細粒既關係 d人一知我餵人奶就叫我餵奶粉比個女快d肥其實聽到呢d說話對人奶媽媽其實好大打擊...係我懷孕個陣我家姐,我最好既朋友成日都講算啦睇死你好快嗌攰唔餵！我只可以努力扮聽唔到...到依家第28日塞過2次奶作病頭痛都堅持泵依家雪櫃都會有9餐係到。係出世第8日第一次番健康院體重係收水後重番去出世體重同埋好叻女一d黃都無我用行動證明左自己而西瓜妹就用佢體重健康去證明媽咪西瓜妹多謝你

*親戚們既比較
係生完第20日其中一個親戚黎探媽咪係對話中得知佢個女都同我一樣過左預產期呢幾日會生依個親戚就黎問我地生完食d咩有咩注意有咩上奶。幾日後佢bb出世..我媽打去問候一下點知令人把幾火既對話出現左:我個女有得打無痛仲有個孫好大隻大隻過你個孫仲擔心好似你個孫咁細粒個女住私家房......聽到依到我媽仲嬲過我。我好想講起碼我好叻捱到痛個女細粒唔洗吸出黎雖然過預產期先出世但佢都好叻無吸入胎糞同羊水，仲有我個女好健康。