BB乳酪點揀好？ 為BB補充益生菌有助腸胃健康

當BB 6個月大嘅時候，爸爸媽媽可以餵BB食適量嘅乳酪，因為乳酪含有大量益生菌，可以促進BB嘅腸胃健康。不過，市面上嘅乳酪眾多，爸爸媽媽應該點揀呢？餵BB食乳酪又有咩需要注意呢？而家小編一次過話你知！

1.乳酪其實係奶製品嘅一種，當中含有豐富鈣質同益生菌，益生菌是活嘅微生物（多數是細菌），同人體腸道內嘅有益微生物相似，可以幫助消化食物、消滅引致疾病嘅壞微生物同製造維他命，所以益生菌被列為好嘅細菌。

2.不過爸爸媽媽亦要注意，BB進食過量乳酪亦會帶黎反效果，曾經有研究指出服食過多乳酪嘅BB會比同齡嘅BB肥胖；此外，乳酪當中亦含有膽固醇，過量攝取亦會影響BB心臟健康。

3.如果BB係第一次食乳酪，亦應該由少份量開始，再慢慢增加份量。

4.喺選擇乳酪方面，爸爸媽媽唔一定要買標榜BB適用嘅乳酪，其實一般不含添加糖份、無防腐劑、人造色素或添加劑嘅原味全脂乳酪已經可以畀BB食，總之就係成份愈簡單愈好。

5.最後，爸爸媽媽唔好將乳酪作為BB嘅正餐，亦盡量唔好畀BB空肚食乳酪，因為空肚時胃嘅酸度較高，會降低益菌嘅生存率，令效用大減；亦容易刺激腸胃，令營養無法被徹底消化吸收。

Text: Mami Editorial