【睡前故事講完又講 講都講到悶 爸爸發揮創意將睡前故事cross-over 與孩子一同創作了解孩子心靈】

話說筆者每晚都會在大女兒睡覺之前講故事，但係講邊一個故事，通常都係個女話事，當然筆者有時都會反抗。

不過，當面對佢最鍾意嘅《龜兔賽跑》同《三隻小豬》呢兩個故事，筆者真係講到「口臭」！上星期有一晚，女兒臨瞓前又叫筆者講《龜兔賽跑》⋯⋯

筆者：「前晚先講《龜兔賽跑》咋喎，又講？」
女兒：「咁講《三隻小豬》啦！」
筆者：「咪上星期五晚講咗囉！」
女兒：「咁講《龜兔賽跑》啦！」

睇嚟筆者都難逃一劫，又要講一次呢兩個故事，但向來唔喜歡沉悶，筆者只好發揮創意，將《龜兔賽跑》同《三隻小豬》呢兩個故事cross-over！

《龜兔賽跑》講到兔仔驕傲個一節，兔仔原來冇瞓覺，去咗同三隻小豬嘅豬大哥玩喎，跟住佢同豬大哥及豬二哥一齊逃避大灰狼嘅追補。當佢哋走到去豬三弟嘅屋企時，就遇到跑跑下迷左路嘅烏龜，於是佢哋一齊入咗豬三弟嘅屋企，然後大灰狼黎到，當然係吹唔爛間屋啦！於是佢哋喺屋企度，等到大灰狼走咗，然後就決定一行五隻動物一齊賽跑，最後兔仔為咗等埋烏龜呢個朋友，於是個比賽就被好勤力嘅豬三弟贏咗啦！

果一晚，個女聽完呢個咁有創意嘅故事，當然好滿足咁樣瞓咗覺啦；呢件事，亦令到筆者決心將唔同嘅故事cross over，例如將《金銀鐵斧頭》同《狼來了》cross over咗，《城市老鼠和鄉下老鼠》就同《鳥、獸和蝙蝠》cross over！

甚至有時，筆者亦會讓女兒參與創作，究竟個故事點發展，筆者都會讓女兒作選擇，《醜小鴨》隻天鵝仔最後搵唔返媽咪，去咗雞仔屋企住，但後來女兒又想天鵝仔有父母疼，又安排父母去雞家找到他；原來，女兒十分重視父母的愛。《吃不到的葡萄是酸的》隻狐狸又食唔到葡萄，反而去咗開水果派對，然後吃食咗佢最鍾意食嘅火龍果，原來女兒最喜歡有不同水果任她選擇。

每晚與女兒一起創作故事，是一個十分不錯的親子活動，更重要的是在創作過程中，筆者能了解女兒不同的想法，有時仲可以問吓女兒點解想個故事咁樣發展，從而讓女兒作更多的分享！加上她能參與故事創作，令她更能投入及專注故事發展！

筆者著實十分喜歡這個活動，如果女兒不嫌棄的話，筆者希望能為女兒每晚都講一個故事，如果要為呢個親子活動定一個限期，筆者希望係「一萬年」；可是，筆者卻又知道，她還嚷著要爸爸講故事的時間已然不多，能做的就只有珍惜當下了。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Scientific Papa

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！