冇咗BB係父母一生嘅痛 5句傷口上灑鹽嘅說話

十月懷胎本來係一件美好嘅事，但即使媽媽平時幾小心翼翼都好，身體內嘅小寶貝都有可能會因各種原因而停止發育，最後爸爸媽媽只能承受極大傷痛，同BB道別⋯⋯請記住，BB嘅離開唔係媽媽嘅錯，作為朋友或親人如果唔知點安慰嘅話，不如靜靜聆聽或給予空間冷靜，絕口不提下面幾句說話！

1.做咩咁唔小心

一個懷孕嘅媽媽無時無刻都好小心，食野小心、行路小心，失去BB已經令媽媽好傷心，自責係咪自己做得唔好或身體提供唔到好環境而令BB離開，請停止怪責媽媽嘅說話。

2.今次冇咗唔緊要，好快有下個

每個BB都係獨一無二、無可取代！永遠都唔會係唔緊要，即使有下一個BB，爸爸媽媽心裡面都會有一個位置留俾無緣見到呢個世界嘅哥哥／姐姐。

3.你仲後生，大把機會

縱然媽媽尚後生，但流產會對媽媽嘅子宮造成重大傷害，會提高下次流產／小產機會。

4.阿邊個個BB好得意

曾經爸爸媽媽都會幻想自己BB出世次後會有幾得意可愛。

5.好可惜，我買咗D野想送俾BB

真係好可惜，唔止你買咗D野俾BB，仲提醒爸爸媽媽買咗一屋野準備俾BB出世時用，每每諗到呢D物件，都會令爸爸媽媽觸景傷情，不時想像BB用呢D物件嘅畫面，但係BB已經無緣享用⋯⋯

Text: Mami Editorial