生BB嘅過程係難頂，但坐月期間嘅禁忌就更難忍耐！

生BB嘅過程係難頂，但坐月期間嘅禁忌真係超惡頂！以下呢幾項坐月禁忌，媽媽又有冇跟足黎做呢？

1.唔可以洗頭

試問順產生完BB之後，有邊個媽媽係可以冇出過一滴汗？滿頭大汗到連自己都覺得臭，唔可以洗頭簡直係折磨！

2.薑水沖涼

生完BB嘅媽媽通常都係有血有汗，所以第一件想做嘅事就係沖涼！但老一輩會建議媽媽最好唔好沖涼，因為產後媽媽身體仲好虛，如果想保持身體衛生都最好用薑水黎抹身，但當薑水流到縫線傷口，真係會痛到癲嫁！

3.唔可以掂生水

要保持BB乾淨衛生，媽媽一日洗幾十次手、洗幾轉奶樽係等閒事，唔通次次都要裝滿熟水先洗？

4.唔可以吹風

媽媽生完之後身體虛弱，最易「入風」而引起傷風感冒，所以產後媽媽要著長衫長褲、戴帽，務求將自己包到實一實。冬天都可以咁做，但夏天熱辣辣，望住個個背心短褲，自己就包到粽咁，真係好惡頂！

5.唔可以流眼淚

老一輩經常會話，媽媽坐月期間唔可以喊，因為老咗會有老花，甚至眼矇嚴重到盲。但媽媽生完BB之後，會受荷爾蒙轉變影響而變得好抑鬱，想喊又唔喊得，點忍？

Text: Mami Editorial