樣殘身材走樣連照鏡都唔敢 產後媽媽易自信心低落

好多媽媽喺產後都會因為自己嘅外貌轉變而變得冇哂自信，甚至會認為自己冇哂魅力，擔心另一半會嫌棄自己，連鏡都唔敢照！以下呢幾項又有冇講中媽媽嘅煩惱呢？

1.體重增加

好多媽媽喺懷胎十月嘅時候會一人食兩人份量，希望生出黎嘅BB會肥肥白白，點知生完BB之後，體重已經返唔到去未生之前嘅數字，仲因為要補好身體同餵母乳而食得愈黎愈多，又冇時間做運動，體重只有直線上升。

2. 妊娠紋

就算懷孕期間搽幾多妊娠膏都好，唔少媽媽個肚皮都會長出一條條又粗又長嘅妊娠紋，一諗到呢啲紋路係冇辦法消除，真係令人好灰心。

3. 肚皮鬆弛

岩岩生完BB果幾日，肚皮會變得又鬆又皺，摸到都覺得好陌生，唔敢相信個肚皮係屬於自己！

4. 胸部下垂

餵母乳媽媽因為長期手擠或泵奶，唔單止令到乳房嘅顏色變得暗沉，就連胸部嘅形狀亦會改變，變得又鬆又下垂。

5. 黑眼圈

自從BB出世之後一直都冇覺好訓，媽媽臉上長期都會掛住一對黑眼圈。

邊個女人唔貪靚？媽媽為咗生BB不惜付出上述嘅代價，請爸爸們好好愛惜另一半，唔好只將注意力放喺BB身上，要多多安慰同讚美太太呀！

Text: Mami Editorial