【回顧瑪嘉烈生B過程順產變開刀】

By Suki 綿綿媽媽 on 15 Aug 2018

懷孕第40W+3D, 綿綿終於出世喇，襯現在還有記憶，我要將整個過程回顧記錄下來。

如果媽媽有任何作動要入院，瑪嘉烈醫院首先會安排媽媽到產房觀察一段時間，例如聽bb 心跳，量血壓，check 宮頸等等，再無動靜先能安排上產前病房待產。產前病房可以開電話及上網，而產房入面就唔可以，如果怕悶，可以帶定書仔去睇，不過會經常聽到隔離有媽媽大叫及生B 既聲音，其實聽到會覺得好驚好緊張，如果要用電話通知屋企人，可以問姑娘借，另外探訪時間係 12:00pm - 1:00pm, 5:30pm-7:30pm, 每次最多只限2個人，不過產前病房可以轉人，而產房就唔可以，所以如果係產房待產都要有心理準備。

之前試過一次見紅(4月12日) ，一次懷疑高位穿水(4月22日) ，分別入過2次醫院，最後都係無動靜住左一晚就出院。到第3次陣痛入院，終於可以等到綿綿出來喇！

雖然我懷孕時期做了好多準備功夫，但原來有好多突發事情係估計唔到的。本身預計自已可以順產，最後結果都係要開刀。

4月26日 (40W+1D)
其實係前一晚，已經懷疑自已陣痛，最後綿綿爸爸忍唔住第二晚11:30pm帶我入院，首先觀察一小時bb 心跳及胎動，另外我當時我大約15至20分鐘陣痛一次，而且keep住肚痛急屎感覺，但又唔可以屙，因為姑娘話怕會將bb 屙出來，加上又keep 住見紅，感覺都幾難受。姑娘話到我痛得密d先進行宮頸檢查，至少要有5-10分鐘一次，所以一直係產房痛住等，完全瞓唔到，等待期間，仲聽到好多人不停按鐘入院，相信呢段時間好多bb 將會出世。

4月27日 (40W+2D)
其實間唔中都會有醫生或姑娘入來問我，幾耐痛一次，可能我天生勁怕痛，已經痛到標晒冷汗，根本都唔知自己幾耐痛一次了，等到上午 7:00am，送早餐來，已經痛到食唔落，當時好似大約10分鐘痛一次，最後姑娘話轉頭幫我檢查宮頸，但一等就等到10:00am，姑娘先來幫我check 宮頸，最後check 左宮頸未開，唯有再等。呢段時間不停聽到不同媽媽大叫，有d話痛到唔想生；不停聽到姑娘醫生講「出力」、「就得」等等說話；仲有bb仔喊聲⋯⋯聽到我好有壓力，開始好驚！直到12:00pm, 送午餐來，雖然好肚餓，但都係痛到食唔落，我記得綿綿爸爸和奶奶來探我時，爸爸都盡量餵我食，因為我係痛到坐唔到拎來食，仲有佢地話要食飽d先有氣力生綿綿。直到 3:00pm，姑娘幫我貼上止痛機，可以減輕少少痛楚，但仍然都係好有肚痛同急屎感覺，而且一痛，對腳就會亂撑，跟住姑娘叫我多落地行，希望可以快d開到度數，最後仲拎埋分娩球比我坐。我好努力嘗試，終於宮頸開左2度。直到5:00pm 綿綿爸爸再來探我，陪我直到食完晚餐，但都暫時未生得，所以7:30pm綿綿爸爸唯有返屋企等先消息。 8:00pm，有醫生入來幫我 check宮頸，仍然都係得2度，完全無進展，所以醫生決定即時人手穿水及催生，抽血及落左催生藥後，陣痛會痛得更加密，之後姑娘話可以通知老公來產房預備陪產。直到9:45pm, 醫生幫我打止痛針，及給我聞笑氣，希望可以幫我減輕痛楚，但可能我真係太受唔到痛，對我來講，好似一樣咁痛。我印象中，綿綿爸爸來到陪我時，我不停聞笑氣，除左講野九唔答八外，哈哈~仲要聞左2大支笑氣！

4月28日 (40W+3D)
直到零晨2:00am, 綿綿爸爸去左洗手間時候，醫生就來幫我check宮頸，仍然得2度，完全無進展，唔通綿綿住得太舒服唔想出來住？還是怕媽媽太痛？因為催生唔成功，所以要盡快進行開刀手術，到綿綿爸爸回來時，我已經簽晒文件了。因為要入手術室，所以爸爸不能陪產。到2:30am推入手術室半身麻醉，我記得仍然每隔2-3分鐘會陣痛，一痛就會亂撑亂郁，所以打麻醉針時，印像中好似有3至4個人捉住我，最後先順利打到支針，打完針後，成日人突然鬆晒，唔再痛了。因為我係半清醒狀態，加上之前無瞓過覺，所以我盡量都合起雙眼休息，但仍然感覺到佢地喺我肚度郁來郁去。無幾耐，聽到綿綿喊聲，姑娘仲抱bb 過來比我望，話係男仔，出生時間及體重。呢刻雖然好累，但心入面好感動。

綿綿爸爸話等到大約零晨4點幾，姑娘先帶綿綿出手術室，而我差唔多7:00am 係手術室推出來，令綿綿爸爸好擔心，因為我咁耐未出來，以為我有事。原來醫生係入面要幫我清理手術後功夫及聯針，我印象中，姑娘推左我喺一邊好凍既位置觀察，我仲瞓著左一陣。最後將我推到產後病房休息。

我見其他媽媽身邊都有bb係隔離，但因為綿綿出世時有小小發燒，白血球有小小高，怕會有炎症，所暫時要留到家護病房觀察幾日等報告。不過爸爸媽媽可以每日9:00am至9:00pm時間內探綿綿的。因為麻醉藥未過，所以第一日未落得床，探唔到綿綿，唯有靠爸爸去睇綿綿啦！辛苦晒爸爸通宵頻撲及等候，又無得休息，又要你擔心我地兩母子，之後要開始踏入另一個新階段，屋企多了新成員，雖然好多野都會改變，但都希望我地一家三口可以生活得開開心心，幸福美滿啦。