為左令BB可以順利健康出世 準媽媽要戒11類可能損害BB嘅食物！

由知道自己有咗BB嘅一刻起，準媽媽都深深感受到自己肩負起一個重大責任，就係要將肚入面嘅BB平平安安帶到呢個世界。所以無論做咩、食咩都一定要考慮到BB，因為一旦BB有咩差池，準爸爸媽媽都一定會抱憾一生！而準媽媽嘅飲食係最直接影響到BB嘅發展，某D食物嘅成分甚至會損害胎兒嘅神經或大腦，所以準媽媽千萬要留意以下嘅11類食物可以唔食就盡量唔好食喇！

1.香煙

孕婦吸煙係有可能將煙內嘅致癌物質經胎盤傳俾胎兒，有機會導致胎兒早產、出世時體重較輕、甚至會胎死腹中！而孕婦吸入二手煙亦同樣有大機會令胎兒早產、死亡甚至出現缺憾！英國有研究指出，有吸煙孕婦嘅胎兒比起冇吸煙孕婦嘅胎兒喺愈接近預產期嘅時候，動作愈多愈頻繁，推測係同中樞神經系統受影響有關；而喺4D超聲波掃描下，有吸煙孕婦嘅胎兒更明顯露出痛苦嘅表情！所以為BB著想，準媽媽同準爸爸務必要戒煙！

2. 酒

孕婦飲酒有機會導致胎兒出現酒精症候群，更可能令胎兒有面部發育異常等缺陷。雖然有研究指出，孕婦每周飲少量酒並唔會對胎兒有明顯傷害，不過量多量少好難衡量，所以安全起見，各位準媽媽都係唔飲為妙！

3. 高水銀魚類

而家嘅海洋受嚴重污染，唔少深海魚都有機會含有高濃度水銀，愈大條嘅深海魚就愈危險！水銀會破壞胎兒嘅腦部發育同神經系統，所以準媽媽買魚時應盡量選擇淡水魚為主。

4. 罐頭食物

罐頭食物大都經過加工處理，當中添加大量人工合成化學物質，對器官發展中嘅胎兒有一定嘅壞影響，有機會令胎兒器官發育唔健全或引致流產。

5.醃製食物

醃製食物製作過程中，有機會被微生物污染，如孕婦食後，可能會出現腹痛或腹瀉嘅症狀；此外，醃製食物通常會加入大量鹽分，亦有機會增加準媽媽患上妊娠高血壓嘅風險。

6. 魚生刺身

雖然魚生本身含有豐富嘅Omega3同營養，但係未經煮熟嘅魚類，有機會含有細菌同寄生蟲，可以令準媽媽腹瀉或腸胃炎，所以都係盡量唔好食！

7. 未經高溫消毒嘅奶製品

軟雪糕、部份軟芝士同牛奶未經巴士德消毒法處理，準媽媽食咗就有機會感染李斯特菌，受感染嘅媽媽可能只會有輕微症狀或無症狀，但係就可能將病菌傳俾胎兒，導致胎兒流產或夭折，後果可以好嚴重！

8. 預先包裝沙律

雖然水果、沙律菜係好健康，但未洗乾淨或擺放得太耐都係會滋生細菌，所以準媽媽想食沙律嘅話，都係自己整安心D！

9.中藥

準媽媽未必熟悉中藥嘅藥性，為咗避免服食有毒性或滑胎作用嘅中藥，媽媽都係唔好自行去買中藥食，如果非食不可，一定要咨詢註冊中醫師嘅建議。

10. 油炸食品

油炸食品喺烹調過程會產生大量致癌物，胎兒亦有機會吸收到，所以準媽媽應避免進食！

11.含咖啡因食物或飲料

可樂、咖啡、茶、朱古力等都含有咖啡因，咖啡因可以通過胎盤傳俾胎兒，喺胎兒體內存留好長嘅時間，咖啡因會令胎盤血管收縮、有機會令胎兒腦部短暫缺氧，所以如果孕婦長期大量飲用，將對胎兒造成不良嘅影響。

所以各位準媽媽，為咗BB可以健康出世，不妨暫時忍忍口，而作為親密戰友嘅老公，亦可以選擇同太太共同進退，一齊戒口，相信亦有助感情升溫呢（笑）！

Text: Mami Editorial