【父母孩子互相影響 為人父母唔可以言行不一致 隨時都要以身作則】

在筆者心中，爸爸並不完美，他有很多壞習慣，但筆者卻認為他是一個好爸爸，因為⋯他會為了子女去進步，及改善自己戒掉一些不良惡習；其中一個筆者經歷過的例子，發生在二十年前⋯⋯

筆者父親從小已開始有吸煙的習慣，但在筆者懂事後，聞到煙味就會質問父親為何明知有損健康都仲吸煙，更會語重心長咁告誡他吸煙的壞處，令他由大模廝樣係廳吸煙，到要入厠所對住個抽氣扇吸煙，到要落街先可以吸煙，最後，更完全成功戒煙。

回憶起這些往事，因為筆者前幾日做資料蒐集時，見到有一個十分相似的研究，更顯示出子女的介入，原來真係會幫到父母戒掉壞習慣的！

美國佐治亞醫學院做了一個隨機對照實驗，邀請了大約400個學生及佢哋嘅父母一齊參與個研究。其中一組學生如常上課，而父母就收到有關戒煙好處的傳單及一條免費戒煙熱線。另一組學生除了如常上課，他們還被安排上為期12星期有關預防吸煙及濫藥的課堂。

個研究只係追蹤咗一年半，就已經見到子女被安排額外上堂去了解吸煙的害處，比父母自己從傳單中收到戒煙訊息，更有效能令原本吸煙的父母戒煙。換句話說，係現今社會，大人們好易係唔同渠道收到吸煙危害健康的訊息，但煙民父母未必會放係心上。反而係小朋友認知到吸煙有害，對父母作出勸喻及監督，反而更為有效令佢哋決心戒煙！

其實，除了令爸爸戒煙這個明顯的例子外，筆者自己都有唔少「壞習慣」因為女兒而改善；例如朝七晚十的工作狂的習慣，食飯時用電話的習慣，返到屋企唔睇都開住個電視的習慣，都一一因為女兒而戒掉了。尤其當女兒漸漸長大，開始問上一句「點解你叫我唔好做，你自己又做呢？」，筆者就更要事事提醒自己，不要讓自己言行不一致了！

父母與孩子，不一定是單向的教與學的角色；雖然較多時間是父母在指導小孩，但孩子亦可以是父母的老師，在相處中一同成長及變得更好——這亦是筆者這麼沉迷湊自己個女的其中一個主要原因，為的是讓女兒及自己都變得更好！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Scientific Papa

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！