【媽媽母乳餵哺迷思 正向心理小分享】

好開心早前參加咗由 Philips AVENTS所舉辦嘅「母乳餵哺與正向心理發展」分享會。當日大會仲請來嬰幼兒心理學家何善韻博士同一眾靚媽作分析及分享添。

於分享會上，媽媽們都以「過來人」嘅身份分享餵哺母乳嘅迷思同壓力。

小JM雖然已經兩歲幾，但仍未斷奶，偶爾仍然會對「媽媽奶」有所需求，或者小JM需要嘅係一份媽媽所給予嘅「安全感」。

我曾經對餵哺母乳產生過迷思同壓力，亦沮喪過、氣餒過、傷心過；

可幸嘅係我喺母乳路上能夠得到小JM爸及媽媽嘅重大支持，令我可以慢慢從失落擔憂中走過來。

老實說，初為人父母定必事事擔憂，更何況我曾經因為小產而失去過，所以我同小JM爸喺知道有咗小JM之後的確比以前更小心，遇到有自己唔明白、唔清楚嘅事都會直接向醫護人員或助產士查詢了解一番。

小JM出世以後我亦曾經因為長輩們對母乳有所誤解而有壓力，長輩們無心嘅說話頓時令我傷透心，亦曾經擔心重投工作後奶量大跌。

所以懇請長輩們「口下留情」，千萬唔好衝口而出講咗類近嘅說話：

1.) 「你咁瘦，邊有奶架？餵奶粉好過啦！」

2.) 「俾盡你餵到三個月都好啦！」

3.) 「BB要照燈即係食唔夠啦，要補下奶粉，去黃疸快啲架！」

4.) 「母乳唔夠營養，唔好味，所以BB唔食！」（剛好正值小JM厭奶期）

5.) 「BB成日口仔郁郁，一定係唔飽，補下奶粉好啲。」

6.) 「（對BB講）都一歲／兩歲啦，仲食人奶？好醜呀！快啲戒咗佢！」

7.) 「已經一歲／兩歲就唔好鬼餵啦，咁痴身。第時點返學？」

分享會之上小JM媽舊事重提，依然有所感受因而一時感觸，以致眼紅鼻酸，真係失禮啦。

今次分享會其實小JM媽亦有所得著，令我明白到餵哺母乳之路雖然艱辛，但只要以平常心去面對餵哺母乳所遇到嘅問題及困難，母乳路就自然更得心應手。

而且聽完專家及其他媽媽分享之後，亦明白到餵哺母乳嘅產品都會影響到餵哺嘅成效，所以喺選擇產品之前可考慮一下：舒適度、相容性高及切合個人需要嘅產品。

我亦寄望如果再生小B嘅時候亦可以繼續堅持以母乳餵哺。

小JM媽嘅小小心得分享：

產前篇：

1.) 遇有疑問時，不妨向助產士或醫護人員查詢及了解

2.) 向其他媽媽取經

3.) 了解如何準備餵哺母乳

4.) 多讓爸爸參與及了解餵哺母乳嘅資訊

產後篇：

1.) 切忌太完美主義，壓力影響心情，心情影響奶量

2.) 應維持正常社交，擁有屬於自己嘅「Me Time」

3.) 盡可能多休息，照顧好自己先可以有能力湊BB

4.) 多讓爸爸參與照顧小B、做家務等

除咗以上嘅小分享以外，其實餵哺母乳亦機會需要預備一啲周邊產品以作輔助，例如電動奶泵、母乳儲存杯、熱敷/冷敷護乳墊、乳頭保濕滋潤霜等，對當時仲係在職媽媽嘅小JM媽亦有好大幫助喔。

小JM媽好開心可以參與今次嘅分享會，亦好欣賞今次活動嘅概念，真正可以提供到一個機會俾準媽媽及一眾靚媽去互相分享及交流喺餵哺母乳上所遇到嘅問題及憂慮之處，同時亦俾機會我地向專家了解及尋找意見，係一個好值得參與嘅活動，希望日後仲有多啲同類型嘅分享會啦。

大家有興趣都可以Click去睇下個活動嘅精彩片段呀!

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：傑。斯與晴

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！