【懷孕期要知道 按照自己身體清胎毒】

中醫統稱火的問題為毒，好多時越後期的孕婦多見陰血不足，易生內熱，因此會覺得眼澀、口苦、口乾、大便很乾、睡時出汗、口舌生瘡或有妊娠濕疹，這些都屬於胎火現象。

嬰兒從母體遺傳到風濕和熱毒，皮膚會容易現現紅疹，孕婦在懷孕後期清胎毒，就可驅走胎兒火燥，BB出世後脾氣會較温純，少有夜哭問題。
陀住大小姐個陣，我真係完全冇清胎毒，個陣又唔戒口，大小姐出世就已經受到濕疹問題困擾。記得個陣，幫大小姐帶手套一樣阻止唔到佢抓到周身損，頭皮出哂血，諗起真係心痛，陀住二小姐唔想重蹈覆轍。雖然唔知道清胎毒係唔係真係有效，不過寧可信其有，決定一試。
孕婦在三十週後就可以清始毒，三十週好似早左少少，我選擇三十四週開始，避免太早，坊間流傳好多清胎毒既食物，不過我就覺得食之前真係要小心謹慎。

1) 白蓮鬚

益腎止血，聽聞左好耐，本身打算用來清胎毒既，不過，上網睇過好多孕婦因為食咗，喺生個陣就遇上度數等好耐唔開既問題，最後要開刀，我自己就唔想冒險一試了！

2) 龜苓膏

由於唔清楚製作成分岩唔岩食用，小心為上，我自己就唔選擇食用。

3)海帶綠豆糖水

綠豆性涼，有機會令孕婦易早產，我就唔選擇了，等BB可以自己選擇邊日出世。如果鍾意食綠豆糖水，我會建議BB足月先好食用來清胎毒。

不過，街外食就唔好了，唔知店舖有冇落陳皮煲，要食就一定要自己煲，加果皮中和綠豆涼性。

4) 粟米鬚水

清熱同利尿，有助去水腫，適逢我發現自己有少少發水面珠問題，我就選擇飲用。

5) 芝麻糊

一向好鍾意食，我就一定會選擇，不過為左減糖，我就自己動手做。

6) 腐竹薏米蛋糖水

助產同消水腫，我對薏米麻麻地，不過腐竹同蛋係我杯茶，我都會選擇。

7) 西瓜

糖份高，食只可以少量。

8) 椰青

一星期一個，飲完可以食埋椰肉。
粟米鬚水做法 : 兩両粟米鬚，一個果皮

一公升水滾起計煲半小時，略加少許冰糖調味就飲得。真係少少冰糖好啦！飲太甜唔得架！

芝麻糊做法：芝麻三分一斤，粘米粉三分一碗

粘米粉加入大半碗水拌勻，待用。

洗淨芝麻再隔乾水分，用白鑊炒香。

芝麻分兩次打，一次打，攪拌機會打得唔夠勻，每次芝麻加入三杯清水打。

打好就可以倒入細密的過濾網隔去芝麻渣。

我鍾意食落有少少口感，我會加番部份芝麻渣番落芝麻漿。

芝麻漿放入鍋中，再加入四分三粘米粉水，攪拌至完全混合。

開大火一邊攪一邊煮，煮至微微滾就轉細火。

加入一片片糖，一路滾一路繼續攪拌至片糖完全溶化。

芝麻糊要有黏住湯勺既效果就算理想。

如果太稀就慢慢再加入剩餘的粘米粉水，如果太稠就加入適量水再煮。

腐竹薏米蛋糖水 : 兩片腐竹，剝殼雞蛋四隻，薏米適量。

腐竹清洗乾淨。

薏米洗淨浸半小時。

六碗水滾起，放入薏米，大火煲十分鐘後就加入腐竹。

大火滾水計再滾多五分鐘後就轉細火煲一小時，放入雞蛋煲十分鐘。

最後略加少許冰糖調味就食得！

同樣個句：唔好食太甜！

自己身體自己知，清胎毒要按自己體質而行，唔好跟人！

就算係要清，一樣要適可而止，有時太多可以會適得其反！

四月十三日三十八週五日，二小姐依然未有任何動靜！

唔知二小姐嘆多幾日先肯出來見人呢？

二小姐過左四十週少少出世，好彩既係唔駛催生！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！