【好人奶奶世上難求？只要兩婆媳互相坦誠同理解老一輩會縱孫全因內心存有補償心態？】

By 港媽的第二生活 on 31 Jul 2018

大熱劇集《BB來了》刻畫婆媳糾紛，引起不少媽媽共鳴。有人說是在渲染奶奶與新抱的紛爭，我會說是因為說的人未有把劇集看下去。看下去的話，其實正想要各位媽媽們明白，新手的不止你一個，做人婆婆嫲嫲都要學。育兒觀念日新月異，醫學理論推陳出新，老一輩需時了解，不在話下。而他們要時間調節的，還有心態。

不是說專制、橫蠻、我話乜就乜那種，那些比較準確的說是姿態，是天生格衰。心態，更多時是贖罪心態、是補償心態。先說我奶奶。
我是幸運的，即使與奶奶同住，卻沒有婆媳糾紛。老公說，因為奶奶眼睛不好，所以不敢亦不會對人有要求，亦很虛心。還在懷孕時，老公明言要如奶奶一樣教導女兒。「佢好勁架，幾歲就由得我煮飯俾細佬食，我自己一個由順利邨去黃竹坑整相機佢都唔知架。」天生天養，我老公的意思是，奶奶對他放任，才成就了今日的自己。放任？對佢就係，對住個孫，完全不是老公口中那回事。

喊大聲一點便心痛，心痛便忍不住要抱著孫女哄睡；每天樂此不疲地抱著她玩，唱歌又有、扮玩過山車又有（佢都60歲人）；女兒不停口擘擘，奶奶就不停說囡囡在錫嫲嫲。事情這樣發展下去，根本就會縱個孫啦。「以前生完你老公之後，我奶奶老爺就唔准我坐月，要我去返工，我係直程唔俾掂自己個仔，男孫嘛，佢地要霸住黎湊。有次我特登早起身，返去抱走我個仔，佢地仲鬧足我九條街。」奶奶剛把睡熟了的BB放上床，與我開始聊起來，原來佢先係婆媳糾紛的受害者。

奶奶甚少表達自己，除非你問她。在我催生那天，她緊張非常。到我坐月，大方的陪月姨姨同時亦有照顧我奶奶飲食：「唔係咁樣我都唔發現原來坐月、食療呢啲真係咁緊要。我都好似坐完月咁，個人健康咗。」奶奶有點像小孩，說話直接，每天劈頭第一句就問陪月姨姨有乜食，同時又如上課般學習各種湊孫秘技。「原來人奶係咁勁，真係BB飲咗咁耐病都唔病下，仲要無食奶粉嗰啲痰。嗰陣你老公唔食奶，我老爺奶奶仲餵佢飲湯，飲到佢入醫院，仲要俾佢地話我個仔孱、無用。我真係好嬲。宜家你食得好，佢又食得好，我都係今時今日先識呢啲野。」
BB 100日，老公在百日宴影大合照時，錯手整跌個成千蚊的蛋糕，跌落自己阿叔個頭上。係好笑嘅，我都沒有怨他。奶奶對著BB說：「BB，等你六個月時我地再買生日蛋糕同你切。」我是冷靜型媽媽：「下，半歲唔使啊？你都唔會喺60歲半切蛋糕啦。」「喂阿媽，你從來無慶祝我生日架喎，唔切蛋糕。」老公呷醋。「唓，我有同你擺滿月㗎。」奶奶，你真係好偏心。

「咁你會唔會覺得，自己宜家想喺個孫身上，搵返初初做媽媽嘅感覺？」我問。
.
「都係架。我連一次奶樽都未試過餵。」What？你又話識餵我先俾你餵BB。「係㗎，以前你老公就我奶奶老爺搶咗黎湊。到細仔，我又要去返工，都係俾隔離鄰舍湊，基本上唔使自己照顧。你地教我我先識得用奶樽。宜家啲奶樽又透氣又盛都好新潮啊。仲有拉拉褲，好方便，啱哂我幫個孫換片，似著褲，對我黎講易好多。」如果，我個囡出現，可以令奶奶好過一點，而她又不會干預我與老公的湊囡方法，我其實好樂意、也樂見她可以因此放下鬱在心中幾十年的怨恨。

「自己對住個仔做唔到嘅，想統統做落個孫度。」好人如我奶奶的，佛系如我的，自然天下太平。但遇著執著的奶奶與媽媽，還有未生仔前已很一般的婆媳關係，奶奶這樣的補償心態，便容易與媽媽們的想法抗衡，擦槍走火，像盧宛茵與李佳芯。看下去的話，就會發現，連婆媳關係也是貴乎坦誠與打開心胸，互相理解與學習。
.
「我本來都幾縱個孫，但自從見過你媽嗰種錫法，我就覺得使唔使啊？都真係可以唔使再對佢太好，廢事佢刁蠻。」你啱啊奶奶……