【BB成長父母亦一同成長作為父母應多讓孩子體驗哩個世界】

By 港媽的第二生活 on 31 Jul 2018

2018年新手媽媽，典型人馬座，最怕無左自己無左自由。但我深信，湊仔同活出自己無衝突，唯有愛自己先識點樣愛別人，包括自己嘅子女。決定開個Blog分享自己努力尋找work-life balance的過程。

上月某天，老公突然send給我長洲渡假屋的相片。他說：「不如去長洲住個兩日一夜，測試下BB能否在外過夜，先決定去唔去日本。」「好呀。」我不以為然。

去長洲前一星期，與老公經過商店看見色彩繽紛、一層一層的蛋糕款BB泳衣，我們興奮地買下。「嘩，正啊！可以去長洲沙灘同BB玩水玩沙影寫真……」爸爸想著小情人時連表情也在甜。但就在此時起，我竟然不斷地擔心。「唔知屋企支BB防曬同蚊怕水有無用呢，BB好易曬傷，啲蚊又好易傳播疾病」、「唔知邊度睇過海灘啲水菌落好勁，唔可以俾啲水掂到BB塊面」……似是胡思亂想，又似合理非常的質疑不斷湧現在腦海之中。我不想掃興，又覺得每件事都可以有預防方法，如多補防曬、有太多蚊即走、抱住BB俾佢腳仔感受下啲海浪就算等等等等，所以都遏抑了自己的憂慮。難得爸爸日日工作，每日都說掛念BB，又自己買哂所有野、安排好哂。

戰戰兢兢上船，興奮地拍照過後，才突然醒覺BB其實有機會暈船浪架喎。「無事架，慢船唔浪。」老公安慰我。於是我繼續遏抑負能量，開心的跟BB又玩又拍照，她竟然表現從容、興奮。看見她一身渡假打扮，眉頭眼額間滲出少女味，我又好像好了一點。

幫BB換了泳衣後落沙灘，看見沙灘滿滿是人便覺得他們就是細菌，突然又緊張非常。「我地去李麗珊沙灘吖，行遠少少，但少好多人。」老公的長洲朋友說。到埗後，我便急不及待為BB補防曬噴蚊怕水，BB表現有點睏，太陽亦開始下山，決定短留一會便走。「嗱，老婆，我特登買咗個游泳學習椅，BB坐在入面根本塊面唔會掂到水，你唔使驚。」老公真細心！

把BB放在椅上，是稍為低了一點，但還可接受。她好像有點抗拒，但漸漸適應載浮載沉的感覺。爸爸於是上水拿他的攝影器材，我繼續看著BB，突然看見一個較大的浪湧至，我拼死捉實BB，再奮力站穩抱她起身，差點她就會食到海水或被粗糙的沙石刮損，我還未來得及害怕，BB已經大哭起來。爸爸趕至抱起她，她秒速便睡著了。我們把BB放低給同行的朋友照顧，一同下水。猶有餘悸的我並沒有怪責任何人，除了自己。

「我應該捉實佢，佢頭先差啲整親，成塊面都係海水。」
「你放心啦，你個BB表現根本已經好大個，好勇敢，對世界好好奇。呢啲對佢黎講係好好嘅體驗，你無得因為要保護佢，而阻止佢接觸呢個世界。我從來相信天生天養。」
「我明白啊，但如果BB因為今次發燒、生病，小病都話係體驗無所謂，咁大病呢？你會唔會內疚？」我的語氣是非常冷靜，是在理性探討我們的感性反應。
「咁你咁講，我會內疚到死，所以咪做足所有預防措施囉。但如果個天都要係咁對我地同BB，都無辦法架。保護與過份保護之間，其實只差一線。」

我決定不去胡思亂想，看見BB整晚身體、情緒、胃口、皮膚都正常，便放心了不少。我個囡喎，唔係豆腐做嘅，我更加唔會令佢受傷，我要信自己。更大膽到另一天又帶她到會所泳池下水禮。BB竟然很怕，坐在那張學習椅上不停哭。「唔使驚㗎，妳以前喺屋企吹氣泳池都係咁游架喎。」我們勉勵，她繼續哭得很慘。

「算喇老婆，同佢影兩張相就上樓了。」我竟然不想這樣，抱緊BB在泳池中上下左右的慢慢移動。「妳唔使驚架，媽咪捉實妳，唔會俾妳浸親架。妳知唔知人喺水入面感覺好輕，好似飛緊咁㗎？」我用兩手托著她的腋窩移動，讓她以趴的姿勢在水中浮動，她的表情慢慢輕鬆起來，並開始微笑。老公趕緊拍片，她竟然從容得自己踢腳，伸手觸碰相機。「藍藍，有咩野要同嫲嫲婆婆講啊？」爸爸訪問BB。「ERRRRRRRR，errrRRRR」BB發表技能解鎖感言。那一刻，我感到父母專屬的驕傲。

BB比我想像中堅強，我慶幸自己堅持、老公細心，大家一同耐心地引導，才讓BB有個愉快的周末，在成長旅途上邁向一步。而在妳成長時，我也在成長，從這些許許多多的事，學習放手，學習鼓勵別人，學習不當一個溫室。做父母的只能盡力保護，並不能永遠禁固妳於城堡裡，阻止妳享受世界給妳最純粹、最自然的美好。「妳放心啦，妳遇到咩困難，我都會同妳一齊克服。」這是以後日子的預告。