【母乳媽媽貼身之物 應點揀至啱？同你推介3款方便舒適嘅哺乳Bra】

我既人奶路係蠔豉妹妹7個幾月大既時候正式完結~加上儲落既奶，蠔豉妹妹係9個月大既時候正式變成奶粉BB :p

之前訂立既6個月人奶路總算捱過左，下次再同大家分享一下收奶既方法，今次想講既係餵奶bra~

由陀住蠔豉妹妹大概9個月到，我就已經開始著哺乳bra~前前後後我都買左十幾個~主要分為以下三款！

1. 前扣開胸-哺乳內衣

呢款係我最愛既款式！用過之後我發現另外兩款真係唔多好用...

由於哺乳期間係會貼防漏乳墊，用呢款時BB埋身既時間可以將乳墊既部分用腑下夾住，唔會掂到BB~比較衛生！

而且呢款無野cool住，到真係上奶時，個胸好漲都唔會覺得唔舒服 :)

2. 向下揭式-哺乳內衣

呢款係市面上比較貴既牌子都係呢類型...但如果你比較多奶，好易漲奶，其實好cool，佢其實只有乳頭部分無野cool住，多奶媽媽未必舒適。

不過，宜家有好多下揭式係真係可以成個胸無野cool住~

不過向下揭式係餵BB時，BB既手同身有機會掂到乳墊位，個人覺得唔太衛生~

不過如果係泵媽就無乜所謂~

3. 無扣式-哺乳內衣

呢款係最平既，淘寶、網購都好多，個人覺得係一塊布only...

無承托力，貼乳墊都唔方便...一拎個胸出黎個乳墊一定移位...加上埋身時要將塊布自己zip係胸下，如果漲奶時又係覺得唔舒服~

如果著呢款，其實我覺得同唔帶bra無分別，因為連用乳墊都成問題...

以上所有內衣圖片都係網上圖片，不過每一款都真金白銀買過 :p

每個媽媽都希望自己係多奶媽媽，所以買哺乳內衣都要好好選擇，千其唔好買鋼線既普通bra，因為鋼線會有機會壓到乳線，一陣塞奶就慘豬豬啦！

每次見到蠔豉妹妹食完人奶既嗰個醉奶樣，你就知幾痛幾攰都會捱得過~

各位人奶媽媽/準媽媽都要加油呀！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos :  Pig Wing

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！