做囡嘅時候無動力去學～有咗小朋友後會學嘅5樣技能！

媽媽喺好多小朋友心目中，都係無所不能嘅，無論佢地遇到啲咩問題，都會第一時間搵媽媽。初生嘅時候，肚餓或者尿片濕咗搵媽媽；大少少，想食想瞓想玩，總之想唔到辦法就搵媽媽。

唔知係咪因為有呢種被需求嘅感覺，好多媽媽都為咗小朋友增值自己，以下幾樣，係最常聽到新手媽媽們討論嘅新興趣。

1. 煮嘢食

以前可能連煎蛋都唔識嘅媽媽，都會由學識煮粥仔開始，慢慢再學識整簡單健康嘅菜式，同埋煲湯。例如蒸肉餅，同埋蘋果瘦肉湯。其實唔單止煮嘢食，媽媽仲會化身營養師，注意飲食健康同埋均衡營養嘅攝取。

2. 整蛋糕麵包

蛋糕同麵包都好多媽媽去學整架。可能因為兩樣都係小朋友成日食嘅，自己整嘅話，又可以知道同埋控制到成份，而且望住小朋友食得津津有味個樣，媽媽一定好有成功感同滿足感。有一種動力來源就係叫做，仔女話「媽媽整嘅好好食！」。

3. 基本急救常識

相信就算唔係正式去報讀急救班，好多媽媽都會從唔同途徑去增值呢一方面嘅知識同資訊。

由兒科醫生名單搜集，到簡單嘅止血同處理受傷方法，媽媽都不斷學習同埋收集資料，以備不時之需。

4. 織冷衫

為自己嘅小朋友織件冷衫，或者織頂冷帽，唔知算唔算係大部份媽媽嘅必定目標呢？

5. 游水

雖然學游水聽落好似唔關小朋友事，但都聽過唔少媽媽見到小朋友學游水，自己都好想去學。以前會懶懶閒，提唔起勁去學，但見到小朋友開始學喇，自己都好想學識，講到尾，其實都係因為想陪小朋友玩水。

Text: Mami Editorial