【淘寶買BB圍欄同BB餐椅抵唔抵？話你知邊款至平靚正兼教埋你集運送到返屋企】

By kylife on 10 Jul 2018

#90後媽媽#分享新手育兒懷孕經歷#享受每天與囝囝共同成長的時刻#想看更多可以到我的Facebook專頁Kylife

上次介紹喺淘寶買450蚊3人沙發引起好大迴響，如果大家Miss左可以係我既文章搵返！今次再下一城分享我為筋肉寶寶買既BB木圍欄同BB餐椅，依兩款物品係香港有好多選擇，不過價錢同淘寶實在差一大截，特別係圍欄：最近好流行既韓國出品差唔多賣到一二千，就係因為咁我就去淘寶發掘啦！

首先講BB圍欄，淘寶既BB圍欄有好多款，價錢由最平排到最貴：膠板款<木欄款<軟墊款

本身我想買膠板款，但諗深一層膠板邊始終比較厚，入面既活動空間就會更細，而且擔心塑化劑問題，所以木欄款就係我最終選擇既款式。

經過我左度右度搵到間單買比起成個架買更平既店，而且呎吋可以照自己屋企範圍去選擇，所以一定會岩自己屋企既擺位。最終我買左2塊110cm，1塊80cm同1塊80cm帶門口，咁四邊就係110乘80cm。淘寶BB實木圍欄Link

當我收到實物已經覺得幾好，全實木，仲有附送防滑膠貼！之後就出動老公幫手啦，砌完覺得比想像中更好，宜家筋肉寶寶十個月大成日都會扶住個欄企起身。睇到依度可以話比大家聽依個滿意度100分既實木圍欄盛惠人仔190蚊，運費下面再講講。

第二樣係BB餐椅，我睇左好耐搵到一個可以較高較低既BB餐椅。頁面有埋安裝影片，安裝非常容易，實物同圖一模一樣，依款粗用我覺得可以，但如果好追求完美我覺得就唔好考慮依款，依款BB餐椅盛惠人仔70蚊。淘寶BB餐椅Link

以下講運費問題，上次我係天貓官方香港站買嘢直送香港住宅地址，而今次就係集運處理，所以費用上會比直送貴少少嫁。集運係將貨運到大陸倉集合再運嚟香港既意思，由於今次係運重嘢既關係，所以我揀既集運商係專運大型貨物，依邊唔開名啦想知既請PM我。用依種集運有一個特色：貨夠多夠重，變相可以慳首重錢，只計續重費用，所以有唔少買淘寶傢俬既朋友會用到。