待產媽係女皇 產後媽係女奴？細訴4個懷念佗B嘅美好時光

常聽人講：「大肚嘅女人最靚」！女人除左結婚外，佗B生仔都可以話係另一個階段！十月懷胎，雖然攰同辛苦，愈近產期就愈想快啲「卸貨」，但當生完BB之後，隨著身邊嘅事物一下子轉變，眾人嘅目光由自己轉到BB身上，都不禁懷念佗B嘅美好時光。

每次產檢照超聲波時，看到BB同自己「揮手」

每次產檢，唔單止想知道BB同自己嘅身體健康狀況，仲係見BB嘅快樂時刻。最初見到BB影時心入面都有丁點震撼，當到三、四個月時透過黑白螢幕見到BB同自己「揮手」，更會笑一笑，然後輕聲講句：「同你老豆一樣百厭。」

老公無時無刻化身緊張大師

同另一半報喜後，都會有種「我只係大左肚，有BB，唔係癈人」嘅感覺，皆因只要有任何風吹草動，老公都會十分緊張，如出街就會拖到實一實，又會不停提醒「地下濕小心行」、「有級樓梯小心唔好跌」；而到瞓覺個陣，半夜有少少聲又或者轉個身，都會問「做手唔瞓？」、「係咪瞓唔著？」、「腳又抽筋？」，但哩啲都係老公表示愛嘅一種，相信老婆們係唔會嫌棄，反而更樂於見到，甚至希望生左之後都可以繼續看到，而唔係聽到BB聲而拍醒自己，講左聲「BB喊了，應該肚餓，你快啲過去啦！」，跟著再蒙頭大睡。

想食咩就有咩食兼煲劇

準媽媽嘅胃口百變，一時想食甜，一時想食咸，又或者想食香口野，雖然係咁，但另一半都會盡力去滿足；而當食飽之後坐係度睇電視煲劇，閒時感受下BB嘅胎動，都已經好滿足。

臨近產期咩都唔怕食

正所謂「少食多滋味」，懷胎十月好多野都唔食得，就好似較為涼性、消暑嘅食物，等到臨近產期，終於可以放心大啖食。

當然啦！有以上嘅好，附帶嘅就可能係孕吐、腰痛、腳腫等等問題，但能夠懷有BB都係一種福氣，好好享受佗B嘅過程吧！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text: Mami Editorial
Photo Source: 熊黛林、官恩娜、宋熙年、陳柏宇@IG、微博