【媽媽唔係商場客戶服務員咪問長問短 盤點有關湊仔激嬲媽媽嘅說話】

其實何止母乳媽會嬲，做人阿媽實在還有太多地雷位日日被人踩。看過大家留言後，又忍唔住手想寫張list出來：

Photo from Photo from PressLogic

1) 做咩唔餵人奶啊？
餵人奶又質疑人地夠唔夠，餵奶粉又俾你話唔餵人奶，咩料啊。我想，個個阿媽都知母乳有幾好，但揀得唔餵就梗有佢原因。例如部分媽媽真的不能捱更抵夜，BB又高需求，最終弄壞身子反而無力照顧BB日常生活，咁對BB又點會好呢？又或者媽媽或BB身體不容許？就算你教埋我又按摩又上奶湯又點又點都好，你又知我未試過？講到尾，使唔使向你交代先？上個年代好多BB都食奶粉大，包括筆者，我又覺得自己幾正常，大家咪又係咁大。

Photo from Photo from PressLogic

2) （每每BB喊，對著BB講）你阿媽唔俾我抱你／唔俾你食／唔俾衫你著
嗱嗱嗱，又離間人地親子關係。BB長大到咁上下，父母們不多不少都想幫他戒掉一些壞習慣，例如抱睡，又或是想拉長一點BB餐與餐之間的時間，方便媽媽回職場後轉瓶餵。這些轉變少不免需要犧牲BB一些淚水。講真，抱你又話我抱慣哂，放題俾BB食奶又質疑佢會黐媽媽，阻住大家日常生活。咁宜家咪試不同方法教囉！BB喊又要指明道姓對著BB講係你阿媽唔俾我點點點，暗示其實自己唔安撫你唔係自己嘅錯，而係你媽媽錯。再加埋有一種凍叫阿嫲覺得你凍…...媽媽聽到BB喊其實個心都好亂、好掙扎、好矛盾，痛都一定比你痛，我們不怕中箭，只求你可以尊重我們照顧子女的方式。

Photo from Photo from PressLogic

3) BB皮膚咁差嘅，你有無幫佢洗架？
我唔幫佢洗，唔通你幫佢洗啊？到夏天，食奶食到勁肥的米芝蓮BB開始容易出疹，肉與肉之間的隙縫常常暗藏老泥，傳出異味。其實媽媽都好煩惱，聞到啲味怪怪地又唔知邊度傳出來，要在阿女阿仔身上地毯式搜索，你估易啊？死同你鬥力唔在講，你都驚自己唔小心拗親佢條頸架嘛，如果啲「摺」是在條頸。洗一次轉頭又臭過，鬼叫BB體溫高咩？如果只係想善意提醒，不如就照直講個事實出來，例如「BB呢度生咗啲粒粒喎…」、「佢條頸好似有少少臭…」，等媽媽再處理吧。下下都用問句想迫死誰！

Photo from Photo from PressLogic

4) 宜家啲BB／媽媽咁矜貴，舊時我地點點點
「舊時生完，坐咩月啊，揹住個B就耕田啦，宜家又請陪月又請姐姐，下下買幾千蚊藥材，咁矜貴。」我真係聽過啲咁嘅野。你！叻！囉！咁鍾意覺得一蟹不如一蟹，不如你生哂佢啦。唔得嘅，你就由我用我負擔得起，同我覺得舒服的方式照顧自己照顧BB照顧家人吧。

5) 照顧BB係媽媽責任，以前啲男人點會幫你，宜家咁多人幫手仲叫老公幫
「我幸福啊，唔得啊！？」試過有次出門口，爸爸舉手執媽媽包，點知咩都帶漏。在我發脾氣之際，竟然有個長輩話我，話執BB野係阿媽嘅責任。咁即係叫我檢討啦？Sorry，我只是覺得承擔了責任就應該做好佢，做唔好俾人嬲下真係好應該，才會汲取教訓下次帶齊野。照顧BB應該是父母共同的責任。你可能會challenge我話你都係全職媽媽啦，爸爸要出去做野已經好辛苦。對，我明白，但我全職做人阿媽，唔代表阿爸在照顧小朋友的過程上少少也不用付出、不用學習。爸爸媽媽是一team人，通力合作才能全面照顧BB。外人還是收收口吧。

Photo from Photo from PressLogic

6) BB唔舒服，餵佢食XX啦（甚至做埋/喪迫個阿媽做）
咩料啊，你係醫生啊？知唔知BB出生首六個月，消化系統未完善，唔可以亂咁餵食，隨時食死佢。食死佢，邊個賠個仔俾我？病向淺中醫是常識吧，你考返個牌再同我講。

Photo from Photo from PressLogic

同場加映：
7) 你要湊仔，你出得街咩？/ 你飲得野咩？
好多同輩都會講，唔生仔住喇，生咗無自由。然後約大班朋友玩時，第一句就問已為人母嘅我「你出得街咩？飲得野咩？」真係sad架聽到。我正正是想平衡一下生活，才會想見朋友，做一下生仔前會做的事。可不可以，在乎於阿媽如何安排、如何與隊友協調，應承得你自然有諗過的。就讓媽媽放放假吧，畢竟，阿媽只是在原來人生裡添加多一個身份，在良母以外，我也可以是個壞孩子。
.
BB出世後，世界的重心仿佛都在BB身上。媽媽們似商場裡的「客戶服務中心」，自己父母、老公父母、朋友、三姑六婆，一心想從阿媽口中得知BB的消息與資訊，誰人在乎客戶服務員今天過得好不好？現實是，媽媽不為「你想知啲咩」而活，BB過得好才是最重要。每個媽媽都有自己的方式愛護孩子，不具傷害性的，你又何需說三道四？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 港媽的第二生活

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！