【要養要教生定唔生要諗清楚小朋友絕唔係副產品】

mami熱話爸媽分享

By 波波頭mami on 10 Jun 2018

我係一位九十後，係17年12月30日正式加入媽媽行列，希望同各位分享波波頭以及佢一直既成長過程同埋一啲心得。

照顧一個bb真係一個好大既責任，而且係一件好認真既事。touch wood咁講，就算有一日你同你另一半要分開，離婚，但都唔代表你照顧bb既責任就完。

我想同各位準媽媽或者準備計劃有bb既女士們講下有左bb後既生活。

Photo from Photo From PressLogic

頭一兩個月你可能都會覺得好輕鬆，bb食飽就訓，訓飽就食。覺得原來照顧bb係一件咁簡單既事？

但慢慢3個月之後，bb開始再唔係食飽就訓，可能bb開始周圍望既時間會長左，唔會再訓得咁耐。

到5,6個月既時候，睇野已經好清楚，開始成日笑，成日想撩人玩，唔會再想成日係床，鐘意望啲識郁既野。如果你注意力唔係佢到，佢開始會扭計。

再大啲，可能8,9個月既時候佢又會爬，你要更加注意佢。到10個月可能有啲bb都慢慢識行，行下跌下。到1歲出街就好似甩繩馬騮，2歲3歲更加唔洗講，n班幼稚園小學中學。仲未講有咩發燒唔舒服個啲你更加唔洗抖。

Photo from Photo From PressLogic

你以為真係得閒玩下人地個b咁易咁開心？

生bb之前最好同你另一半溝通清楚有共識，就算你選擇做全職媽媽但你既另一半都一定要抽出時間幫下你，唔好諗住大安旨意要個老婆做晒。因為一個人湊住bb好容易氣餒遇到問題好容易收埋收埋，久而久之到你最後頂唔順既時候可能已經有抑鬱或者情緒病。

Photo from Photo From PressLogic

又或者你選擇生完bb之後係會繼續做野所以你決定請工人或者交比老爺奶奶公公婆婆湊既話咁你就要接受當中既不愉快。始終各位媽媽要明白一樣野，老一輩係有自己一套既湊bb方法可能大家會有意見分歧既時候，咁你就唔可以埋怨，因為無人有義務幫你湊bb，始終個小朋友係你既，你自己唔睇住真係無得怨。工人姐姐就更加唔洗講，純粹主僕性質，你好彩既請到個好姐姐就當然最好，請到個唔好既真係貼錢買難受。