【餵人奶個B邊夠食唔怪得咁細粒啦！盤點一句激嬲產後母乳餵哺嘅說話】

By 港媽的第二生活 on 09 Jun 2018

2018年新手媽媽，典型人馬座，最怕無左自己無左自由。但我深信，湊仔同活出自己無衝突，唯有愛自己先識點樣愛別人，包括自己嘅子女。決定開個Blog分享自己努力尋找work-life balance的過程。

產後回復：一句激嬲產後婦──母乳餵哺篇

百日宴已擺，即代表媽媽我已超過產後三個月。可能因為產後壓力大，或受荷爾蒙影響，這三個月來，不少說話都可以一秒撻著我。集合一些媽媽好友的意見，讓我盤點數款一秒激嬲產後婦，特別是母乳媽媽的說話。

你夠唔夠奶架？

「我唔夠，唔通你夠？」我的友人連同這個充滿敵意的回應一拼send給我。做咩質疑人地啲奶量啫？其實每個女人產後身體都開始製造乳汁，與個胸幾大、個人幾肥等等的因素完全無關。母乳易吸收，相比奶粉寶寶，可能吃完一餐後很短時間便嗌餓。那只是代表寶寶要吃奶，不是媽媽不夠奶。頻密親餵，捱過猛長期，自然追得上奶量。今餐唔夠飽咪早啲食下一餐囉。這是彈性，flexibility，好不好？只要寶寶每日有一定數量的濕片，穩定增重，就已經反映出寶寶夠奶。

（但凡BB喊，對著BB講）BB又肚餓喇，食唔飽咁慘啊？

你唔好老屈住先，BB喊一定係肚餓架？其實BB濕片、無安全感、想人陪時，都會以哭鬧表達。仲有樣野叫「扭眼瞓」呢，想人安撫，想抱，想確認爸爸媽媽在旁才能助他睡覺。吖，仲有，你好嘈都會啊！！！就算BB係肚餓又點啫，我????高件衫佢就有野食，有幾慘啊？你喺度煽風點火我仲慘啊。

BB咁細粒嘅！

你呢句咩意思？你想質疑甚麼？BB基因有問題，還是我餵佢唔大？大人有啲飲水都肥，有啲油浸都唔肥。每個BB體質都唔同啊，相同營養唔一定有相同結果架喎。點解唔可以欣賞下我個BB健康呢？

你啲奶係咪無脂肪，喺哂你個人度？

其實我陀仔時儲的脂肪，正正係用落啲人奶度。我生完無耐成身脂肪真係好正常，你生完幾十年/未生過都仲一身脂肪就真係要檢討下喇。

你又泵奶喇？/ 佢又泵奶喇！

係啊，我又泵奶喇，我又用15分鐘至半個鐘去泵奶喇。你估我唔煩架？你估我真係去蛇王架？泵奶一來為儲糧，不定時泵會影響奶量；二來谷奶真的好辛苦，講緊係前面兩個乳房變成石頭咁硬，隨時演變為塞奶，再變乳腺炎。病唔係最慘，慘在發住高燒都仲要照顧BB。講真，我都想可以泵住奶做野架喎，點解唔整間有枱有laptop嘅哺乳室，方便working moms？不過講真，可能對好多媽媽而言，公司有哺乳室，而不用在雜物房泵奶已經好好，仲講設施喎……

同場加映：

你餵人奶，你食得咩？

我唔食得就唔會食啦，就算唔食得，我都可以食完泵完倒走餐奶，我自有辦法。大家都明，傳統上其實孕婦、產後婦、哺乳婦女都有很多飲食或活動禁忌，有些有根據，有些擺明無理據。雖然大家都是出於關心，但其實甚麼都不能食，甚麼都不能做真的讓人很抑鬱。我的媽媽朋友說：「其實自己都知自己事，真係頂唔順唔會死撐，過份緊張反而讓人好討厭。」猶記得我的陪月姨姨一方面叫我乖乖注意飲食，另一方面亦給我一些cheat time：「你坐完月，想飲啤酒、食魚生，咪食囉。少少唔會有問題，最緊要係有解藥，例如食咗生冷野就飲返杯薑水，餵人奶就可能倒咗一餐佢求安心。唔洗咩都限住。」大家下次想對產後婦說「唔准」時，不妨信任媽媽們的決定吧。

你又有咗啊？

像我這樣的中size婦女，懷孕時體重升得多，產後兩個月就算輕了20磅還是有個肚腩。加上餵人奶，胃口不易收細，想吃減肥產品又唔得。我已不下一次被朋友問到是否又懷孕。我不質疑有人可以產後這麼快便懷孕（其實惡露都要清一個月左右……），但我深信十居其九是未修身/未成功修身。被人這樣問真的會令已經對自身形象欠缺自信的產後婦，心情更加低落。老實說，不主動告訴你我是否懷孕，原因多為：一）我無大肚；二）就算有，未陀穩唔想話你知；三）我同你唔夠friend有咗都唔想話你知。所以，不如朋友們就算有懷疑，都不要問出口吧，反正大肚無得呃，遲早你會知。