【未生之前可以隨心所欲成為媽媽後會不其然將BB同屋企放首位】

By 波波頭mami on 12 Apr 2018

我係一位九十後，係17年12月30日正式加入媽媽行列，希望同各位分享波波頭以及佢一直既成長過程同埋一啲心得。

我係一個90後媽媽，雖然依家既90後最大年紀已經係28歲，最細既都19歲，已經算係大人。而且亦越黎越多年輕媽媽，但我相信同時同齡既人或年紀相若既人依然都係未有結婚生小朋友既打算。

好多時候唔知各位媽媽有無發現，每當同老公發爭執既時候，湊bb湊到氣餒既時候，你想搵個人傾，但你會唔知可以同邊個傾同邊個分享。搵朋友傾佢又未必理解到你想要一個家，同老公好好相處既心態。佢又唔會明湊b既苦與樂。慢慢地，媽媽除左要打理家頭細務，仲要學識消化趕走自己既負能量。

以前可能諗到有咩想做想去，可能聽日或者放假就會即刻去。依家帶住阿b，去邊都唔方便，未買野都已經一袋二袋咁出門。所以無咩事都唔想出門，又唔想亂洗錢，最經常去既地方都變左超級市場，街市。有時上下淘寶，睇下周圍禁下又一日。睇左當買左。

其實做左人阿媽唔等於與世隔絕，只不過，得閒既時間真係好有限。唔係我唔想去同朋友聯絡，但係只係當我餵完奶，換完片，洗埋奶樽既時候。我就要開始掃地，拖地，洗衫。當我可以抖抖禁下電話既時阿b又差唔多夠鐘下一餐。好喇食飽之後終於唔洗掃地拖地，但我又夠鐘落街買餸，買完餸我又要開始準備晚餐。你問我做師奶多唔多野做？其實又真係唔係好多，但係做晒所有野你又差唔多夠鐘訓教咁囉。哈哈。