【夏天將至 推介清甜有益菜式 教你炮製兩款唔同口感嘅麥皮青瓜蝦條】

今次用左蝦做食材，其實蝦有營養，

不過也屬於易引起敏感的食物，

所以先提醒各位媽媽不用太急幫BB加入蝦，

就算後期試食蝦都要小心留意返BB食完之後嘅反應。

我記得Bella 14個月大我就比蝦佢試，

第一次都係1～2隻，

期後數天無敏感症狀就再加少少份量，

最初兩星期先會食一次，

到目前17個月大，一星期都會食到1～2次蝦。

呢款《麥皮青瓜蝦條》絕對係親子共食嘅好選擇，我地一家三口食吾停。

個人口味經驗覺得，蝦同青瓜係絕絕絕配嘅，

有時無胃口或一到夏天，

我就會滾青瓜鮮蝦湯，咩料都吾使落，

加D鹽做湯飯或者就咁飲，鮮甜無比又好refresh。

所以今次有靈感做左呢款食譜，

也可以為吾鍾意食菜嘅Bella混入青瓜。

由於會把蝦同青瓜打成蓉，

口感會似“糕”而非彈牙蝦滑，所以小B啱食，

加入麥皮口感會有D層次，吾會太綿。

 同樣做左“香煎版”及“清蒸版”～

《香煎版～麥皮青瓜蝦條》

《清蒸版～麥皮青瓜蝦餅》

  材料：

1. 蝦仁10隻。我用急凍蝦仁，一來易處理，二來吾會蓋過青瓜嘅清甜，試過用鮮蝦做，蝦味超級濃又強烈，Bella吾食。

2. 青瓜仔約1.5寸長

3. 即食麥皮2茶匙

4. 粟粉或麵粉1.5茶匙

做法：

1. 把蝦仁解凍洗淨去腸，青瓜去皮。

（兩者都要瀝乾水份）

2. 把兩者同時blend成蓉。

3. 加入麥皮及粟粉拌勻。

4. “畢”起蝦蓉，“撻”回碗中，來回十次八次。目的迫走入面空氣，煎或蒸時不會出現裂痕。

^如果用矽膠捧更好，因為不易黏身。

清蒸版：

放約1.5cm高蝦蓉於碟或碗中，底可先塗少少油防黏，周邊留空位，因為蝦蓉遇熱會澎漲。

2. 水滾後 隔水大火蒸8分鐘，再轉中小火蒸2分鐘。（或自行斷測 因不同爐具火力不同）

完成後成了蝦餅，可比BB拎住食或切條切件。

《清蒸版～麥皮青瓜蝦餅》

至於香煎版更易做，

平底鑊上落些許油，加熱後轉中火，放入一團蝦蓉，輕按平至約1.5cm高，轉慢火煎，期間不要移動蝦蓉，也切勿大火，直至感到蝦蓉變挺身，便可試推一推，推得動就可以翻轉另一面以同樣步驟再煎。

直至兩面煎到金黃，或可用牙簽插入蝦蓉，如拉出沒有槳狀物便熟了。

 可以切條或喜歡的形狀給BB吃。

BELLA真係食吾停口。

蝦蓉也可以做多些份量，放入鹽及調味料，便是大人的滋味餸菜。

希望可以食蝦嘅BB喜歡。

下次做會做大衆化嘅《野菜風味蘑菇豆腐薄餅》，記得留意我地facebook更新。

＝＝＝＝＝＝＝＝＝＝＝＝＝＝＝＝＝＝

Text & Photos : 許許

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！