【生BB後必備食物 新手媽逐步揭開炮製薑醋秘訣】

除了產前補身，其實產後補身都同樣重要，我會希望保留傳統習俗, 12朝後向親朋好友派發豬腳薑，所以煲薑醋是不可缺少既一個環節~  懷有" 綿綿BB" 30週開始，我和老爺奶奶已經開始預備買定煲薑醋材料, 其實我上網睇及問朋友，個個都有不同做法，但我都希望將我經歷紀錄下來，及分享給大家~

早期所需材料：(份量視乎媽媽需要, 暫時約20人份量)

1) 老薑/ 生薑 - 12斤 (買左約$80)

2) 甜醋 -15斤 (我兩隻都有買, total $312, 媽媽可以自由選擇)

價錢參考: 八珍-會甜D：$290 (10斤) / $156 (5斤),  同珍-無咁甜：$78 (5斤)

3) 大瓦煲 (今次係朋友比, 如果買最平見過都要$300以上)

後期所需材料 : 

1) 黑糯米醋 - 2支 (600毫升一支，每支$26)

2) 豬手豬腳 （無特定份量, 因應自己需要)

3) 雞蛋 (無特定份量, 因應自己需要)

*** 幸好有老爺奶奶幫手, 先可以輕輕鬆鬆去預備

我地一齊去街市買薑，係長沙灣最平見到 $6/斤

因為薑有好多泥，可以用水洗乾淨及用刷刷走D泥

洗乾淨後，開始批薑皮，不過原來要用好多時間，我和奶奶一齊批，都批左5小時以上先完成，haha ~ 可能我手腳慢

之後將D薑風乾，我地等左3日先完成風乾，不過都好睇天氣而定 (記得每日都反下佢，怕潮濕容易發霉)

之後將薑切件拍鬆, 再放落鑊加小小鹽一同烘炒

同時間可以將甜醋放入瓦煲煲滾，再將炒香左既薑放入瓦煲內一齊煲, 記得醋最好浸過d 薑

第一次煲開慢火煮2小時，之後每星期再煲滾一次. 可開慢火滾30分鐘 (注意：煲薑時醋一定浸過薑面，否則需酌量加入甜醋)

派送或食用前，將豬手豬腳用滾水中飛水15-20分鐘後，用凍水將肥油沖走及瀝乾, （最好拔掉豬手豬腳毛), 再加適量黑糯米醋煲滾, 作用為調節薑醋甜酸度，再加入豬手以慢火煲至軟腍，如果想豬腳淋D, 可以早2-3日放入薑醋煲, 而去殼熟雞蛋可以早一晚放，就不會容易變硬，再煲滾就完成了。薑醋煲放置一晚後，等到第二天進食時再煮滾會更加入味啊~ . 但呢個step未到，所以暫時未有豬腳薑醋既相～不過煮法都是參考，我見每人都有小小分別，大家可以因應自己喜好去選擇的~

*順產媽媽排清惡露，過左12日就可以開始食薑醋， 而剖腹媽媽就最好過左20日後先開始食薑醋

最後刮左留下既薑皮，綿綿媽媽唔想浪費，風乾後可以留來坐月時沖涼用,  為了方便，我已經將薑皮入晒茶包了,因為之前買落既茶包袋太細，所以我預計每次沖涼最小要用5包或以上

我覺得"綿綿BB"真係比左好多回憶及經歷給我, 因為有左綿綿，我會不段上網及問身邊朋友學新知識, 原來係懷孕過程都可以不段學習，諗番起都覺得好有意義^^

＝＝＝＝＝＝＝＝＝＝＝＝

Text & Photos : Suki綿綿媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！