【每日要拎奶泵機返工 母乳媽媽唔易做 為孖B健康幾辛苦都值得】

孖媽係全泵媽，因為babies G唔識埋身...
我冇享受到親餵既親密～
但我仍然會為佢地既健康，付出最大努力
坐月係屋企個陣，1日大約泵6次~~
密D泵，希望製造多D奶奶~~
到復工後，我就1日泵5次~
起身️泵1次，返工時間泵2次，
放工返到屋企&訓前各泵一次~~
幸好都夠奶奶俾佢地全人奶 (偶爾都要補餐奶粉既~~)

但返工後，每日都要一大袋拎返工，放工又一大袋拎返屋企..
分享下要拎D咩:

奶泵機連管、叉電插、喇叭一對、
儲奶樽兩個、儲奶袋、大盒(用黎放喇叭及儲奶樽)、冰袋、冰種

唔好睇少，其實都幾重…
孖媽本身都有買泵奶袋夾，可以直接泵入奶袋…
但感覺麻麻，成日驚佢會跌，
所以我係直接泵入樽，再倒入奶袋。
而係公司泵兩次，每次泵完後就用大熱滾水沖洗兩次再抹乾，
到第二次再用，返屋企先正式清潔&蒸

幸好公司有地方有時間俾我泵…
加上婆婆同老公都好支持我餵母乳~~
婆婆會煲好多湯水比我上奶，老公又會主動做多D家務…
等我泵完可以休息…見到Babies G健康，一切都值得！

孖胎本身我都唔寄望自己夠奶俾佢地…
唔俾自己太大壓力，我同自己講有幾多餵幾多啦!!
今日見到雪櫃呢個奶奶列隊…我都要為自己俾多D掌聲!

咁努力為既就係見到雪櫃有足夠既奶奶俾babies G!
一樽樽放好雪櫃方便婆婆坐熱餵奶
當然冇可能有再多做冰奶後備...
但兩個夠食有存貨，我已經好滿意！

不知不覺泵左3個月～
孖媽第一個目標6個月好快達到！
希望繼續長泵長有～
第二個check points就係1歲啦！

餵母乳真係一件好神奇既事，
有幾多泵幾多~~除左健康，仲慳返唔少奶粉錢XDD”
而且孖媽我好中意餵母乳，因為呢段時間我可以放縱係咁食，
但體重不升反跌，好大藉口俾自己狂食,
而足夠休息多湯水就係長泵長有既關鍵！

Text & Photos : 龍鳳Babies G & 孖媽Gloria

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！