【屋企新成員將到有咩需要準備？同你一齊分享買新成員物品既注意事項】

By 波波頭mami on 06 Apr 2018

我係一位九十後，係17年12月30日正式加入媽媽行列，希望同各位分享波波頭以及佢一直既成長過程同埋一啲心得。

相信好多準媽媽知道自己有左小朋友既時候都會即刻準備好多野去迎接小生命。

例如，可能你會諗，我要重新裝修屋企或者裝修過間房，因為你想騰出多啲空間比bb。又例如，你即刻會準備一個購物清單。所有女人都係購物狂。而有左小生命，更加係一個非常好既藉口比我地好好咁放血。

咁如果你係有喱啲想法既準媽媽就要留意以下喱幾樣野。

第一，裝修。

如果你同我一樣都係黎自普通家庭，無太大預算去汁下間房既，我建議你可以淨係換床。換床既意思係假如你訓緊4呎床就建議你換張3呎，因為你要預留空間放bb床。(唔建議同爸爸媽咪同床)為左bb犧牲小小訓教既空間係一定要嫁喇，bb番到屋企一定係同爸爸媽咪同房最好。你自己都會安心啲，可以隨時隨地睇到bb。而且大肚婆亦唔適合屋企有大既改變。咁迷唔迷信因人而異既。

如果你係知道已經有屋企人幫手湊者你已經預留左bb房比bb就可能唔係咁岩用喇。但如果你同我一樣，以三四人單位計，你同老公一間房，另一間房係老爺奶奶。自己亦等個女/仔大啲先考慮搬出去既，咁你就可以參考下。

第二，bb床。

一張好既bb床可以為你慳唔少。點解我咁講？因為我諗依家好多媽媽都會知依家好流行歐美式既bb床。

但其實喱種bb床絕對訓唔耐，如果你bb出世細細粒就話有機會訓到4,5個月姐，但我諗無一個媽媽係想自己bb係細細粒而唔係肥肥白白既。

咁到左4,5個月既時候，佢又未可以自己一個訓單人床(始終有危險性)，你又要幫佢換一張bb床，咁換黎換去到底為咩呢？

仲有記住一定要揀張可以較高低既bb床，因為bb再大啲想爬或者已經識爬既時候，如果你張bb床無得較低啲較深啲，咁佢又係存在緊另一個危險性。

第三，bb車。

bb車真係要更加更加慎重考慮。我既bb已經3個月喇，一次bb車都無坐過。點解？因為唔方便。其實如果你帶bb出街最好就用袋鼠孭帶，姐係打側抱個種。一來，bb有安全感啲。

二來，其實你推bb車好唔方便，你撘巴士又要收好bb車再上車(如果你2個人以上帶bb出街都叫好啲，但如果你係媽媽得你自己一個就千奇唔好試)，咁唔撘巴士撘地鐵都仲麻煩，人多既時候個個都望住你格bb車，你又唔可以將架bb車變細啲真係好尷尬。啲人整到你bb車自己又唔高興，bb阻到人自己又唔好意思。三來，放係屋企又要搵地方安置，每次出完街仲要幫bb車啲轆抹乾淨先入屋。搞咁多野真係玩死自己。