【新手媽最怕唔夠奶 BB慘豬無得食 新手媽話你知做富媽既上奶小Tips】
90後Fresh Grad媽媽，畢業不足半年做左媽媽，兒女係上天比我最大既祝福。充滿正能量既我，雖然年紀較細，人生經驗唔多，但懷孕過程中，令我對於育兒、教導亦有多左一番心得。希望藉住文章、Facebook Page帶到更多正面信息比一班同行者，同時記錄我懷孕過程同寶實既一點一滴。
係依加呢個年代，餵人奶愈黎愈普遍，好多媽媽都會選擇人奶多過配方奶粉，始終母乳有好多抗體、益生菌等等，可以令BB健康d。由有BB開始，我都好清楚自己好想好想餵人奶，但都會好擔心自己唔夠奶水，所以係生BB之前都做左好多準備。結果係生完之後第二日，已經好明顯感覺到上奶，真係好感恩！
其實BB岩岩出世，我地係未咁快有上奶既感覺，仲記得生完第2日，BB因為要照黃，所以無得成日都親餵，仲要一去兒科就比姑娘問：「你上左奶未架？」「識唔識煲湯啊？唔夠奶就補奶粉啦！」雖然講者無心，但聽者就有意，感覺講到我唔夠奶咁，其實我都係生完一日，好多野都唔識，連「上奶」係咩感覺我都唔識⋯⋯
係醫院既第二日，先有姑娘教我手渣奶、咩係上奶既知識。上奶會Feel到個胸好重、甚至係有dd硬既情況，但當餵完奶就會輕左、鬆左！好多時生完頭一、兩日都未會有好強烈既上奶感覺，但你依然會有奶出，我地身體需要時間去製造同適應，所以千奇唔好急！以下就係由我生完第二開始既上奶記錄，唔敢話好多，但都希望可以分享下！
係懷孕期間，我每朝都會飲牛奶＋谷類早餐，有時返工肚餓都會係飲奶＋蛋糕仔。牛奶有豐富既蛋白質，對生完BB上奶都好有幫助。不過我飲之前會叮返熱，懷孕期間唔好飲咁多凍野！
三文魚好多Omega3，懷孕期間食對BB腦部發展好好，同時又係上奶既偏方，襯早食都會上奶上得快d! 不過記得要食熟既三文魚啊！同時都有聽過朋友講，生完BB食多D新鮮既三文魚，可以令母乳既脂肪厚d，令BB可以飽耐d。
係生前同生之後，我都堅持一日最少12杯水，生之前飲12杯水係為左令自己早d適應。生之後每次餵奶都會平時易口渴，始終母乳都係由水份去製造，所以一定要飲好多水同湯！
係有bb個陣，我婆婆教我，想餵人奶餵得好d，要勤d清潔乳頭，佢話平時著衫會有d野痴左係乳頭既坑紋到，所以沖涼個陣，輕輕力用指甲係乳頭上刮下，會有d污穢走出黎，咁就唔會塞住
另外，沖涼個陣都按摩一下個乳房，可以刺激乳線同放鬆個乳房，用3隻手指按壓一下就ok架喇！
好多時見到自己第三、四日都未上奶就會急急腳就飲上奶湯，其實好多時只係身體反應唔切，並唔係無奶水。太快飲而又撞正上奶，就會好易有石頭胸，谷住谷住好辛苦架喇！
當你了解到bb起身訓教既時間，知道佢邊段時間會訓耐d，就係餵完佢之後好泵奶，製造一個假
象比身體，等佢以為bb要食好多，咁就會製造多d奶架喇！試過有次半夜無泵到，一起身個胸超硬，個刻就知真係唔懶得，如果唔係會變石頭胸！
仲好記得同bb第一次親餵既接觸既感覺真係好幸福，當你見到佢需要你，又同你痴得好close，個一刻真係好希望佢大個左都會繼續咁痴自己。雖然餵母乳唔容易，但正正因為咁，你同小朋友之間又多左一份取代唔到既回憶。最最最緊張唔好比太大壓力自己，就算奶量唔夠都唔好自責，大不了就用配方奶粉，最緊要係小朋友同自己都開心！
【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！
