【臨近預產期要提早執定走佬袋 分享媽媽同BB既走佬袋有咩特別野要帶】

踏入懷孕第31W, 預產期係4月26日，將會係瑪嘉烈醫院順產，係時候要預早準備入院走佬袋, 我覺得我和"綿綿BB"真係好幸福，其實有好多野都係朋友送，唔洗買，最後我都係得幾樣野要買就已經齊晒，未執之前已經上網參考好多不同媽媽分享既資料，另外我更周圍問身邊既媽媽有什麼特別野要帶，當然不同醫院，可能有不同物品需要，最後我綜合晒網上媽媽及身邊媽媽分享，再安排一個合適自己既走佬袋，希望同大家分享～

綿綿媽媽走佬袋：

1) 綿綿媽媽身份證 及 綿綿爸爸身份證副本

2) 母嬰健康院產前覆診咭

3) 瑪嘉烈醫院分娩球證書 (因為要出示證書，證明媽媽已上堂學過fitball ，待產時先可以入房借fitball 練習, 方便減輕痛楚)

4) 少量現金，八達通，密碼鎖 (方便鎖住私人物品)

5) 手提電話，隨身充電器(通常醫院未必有電制位係床附近),  斜咩袋(方便袋住電話，容易同家人保持聯絡)

*** (1-5用品)  因為平時日日要用，暫時未放得入走佬袋，我會另外寫張 list 放入袋，到時就唔會執漏或忘記***

6) 床墊 4 張 (如果唔夠先叫家人再帶來）

7) 扣裝產婦衛生巾一包

8) 黏貼產婦衛生巾一包

9) 產後收腹帶 (媽媽可自由選擇帶唔帶)

10) 孕婦即棄綿內褲 3 條 (媽媽可以自己選擇，不一定要用)

11) 網褲4條 (我問過不同媽媽有不同用量，通常都帶4-8條不等）

12) 傷口沖洗瓶

13) 除菌液 (方便隨時噴在不同地方消毒及除菌，例如厠所板，食飯枱，手部都可以)

14) 厠所板即棄墊

15) 生理鹽水6包 (用來清洗傷口，都是最近有阿Ca媽媽介紹先知，係藥房買 $5一包)

16) 濕厠紙 (如厠後，感覺無咁乾及可以殺菌)

17) 濕紙巾 (方便隨時不同地方消毒及除菌，例如厠所板，食飯枱，手部都可以)

＊忘記了影相，另外記得帶"口罩"

18) 小圍巾 (餵奶用)

19) 母乳專用乳頭護理霜 (媽媽可選擇帶唔帶)

20) 乳墊 8-10 個

21) 豆豆墊 (產後減輕坐下時痛楚，有D媽媽會買水泡，視乎個人喜好)

22) 外套, 帽,襪, 拖鞋 (另外開腔睡衣視乎個人需要，帶唔帶都得),  另外出院衣物，可另外執好一小袋，到出院當日叫家人帶

23) 潔膚及護膚用品

24) 厠紙及盒裝紙巾

25) 洗面卜, 抺身毛巾, 漱口杯, 牙膏, 牙刷 (另外我見有媽媽會帶小面盆，都是個人喜好)

26) 掛扣 (方便隨時附地掛住物品係床頭用)

27) 暖水壼 (焗炒米茶飲)

28) 炒米茶 (因為產後坐月不宜飲水, 通常用炒米茶代替, 我會預先分好一袋袋茶包，方便攜帶)

29) 乾糧 (聽好多媽媽講產後一定好肚餓，所以可以帶備小小乾糧)

執完走佬袋，當然要幫綿綿BB預備出入院用品啦

綿綿BB用品：(生左BB後先叫家人帶)

1) 初生嬰兒紙尿片 (我會帶定一包裝，通常媽媽試過每日大約用6-8片，所以我預多小小）

2) BB潔膚及護膚用品 (帶唔帶媽媽自行決定)

3) 換片墊 (帶唔帶媽媽自行決定)

4) 嬰兒濕紙巾 (用來抺pat pat)

5) 紗巾 6-8 條 (到時餵奶幫bb抺咀仔及墊住媽媽手臂時用)

6) 包被 (可出院當日叫家人帶)

7) 夾衣 (可出院當日叫家人帶)

8) 和尚袍 (可出院當日叫家人帶)

9) 帽, 手套, 襪仔 (可出院當日叫家人帶)

望個 List 好似好多野，但執完其實唔算好大袋

因為我有好多物品都是朋友送，所以有部分物品是獨立分開買，但如果其他媽媽想方便D，可以去吉之島或一田百貨,佢地都有set裝媽媽走佬袋賣，唔洗自己周圍買。如果各位媽媽覺得有其他東西需要加減，歡迎同綿綿媽媽交流及分享，祝各位媽媽生產順利~

Text & Photos : 綿綿媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！