download MamiDaily 親子日常 app
【BB32週無轉頭唯擇日開刀 回想過程驚險  感激遇到有好護士醫生安排】

【BB32週無轉頭唯擇日開刀 回想過程驚險  感激遇到有好護士醫生安排】

懷孕 爸媽分享
By 吉豬媽 on 26 Mar 2018

還記得我同吉豬爸結婚後既第三個月就有左吉吉豬,回望番都算幸運,所以都已經忘卻左頭兩個月唔中既挫敗感。

當時頭一個月唔中,就留意住自己既排卵期同keep住量體溫。到第二個月都唔中,就發現原來懷孕都唔係咁容易,加上知道自己要轉工,就無再嚴格執行我地既計劃,點知就中左啦!

135029018

其實中左之後我自己都無留意,係吉豬爸問我係咪遲左嚟M,我先走去check,用普通驗孕棒驗到中左,好姊妹再教用Clearblue check多次,結果顯示係「3+」!

雖然明知放產假期間係無薪同埋要向新老細交待懷孕既事,但心裡面仍然好高興,好好好期待吉吉豬既來臨~(吉豬爸應該仲高興過我,不過講到高興,四大長老應該係最高興,畢竟吉吉豬係佢地第一個內孫/外孫~)

 

500627386

 

懷孕期間可以用舒服黎形容,無孕吐、胃口正常、情緒同平時一樣(本身已經係又心急又燥底⋯)、個肚唔算好大、一條妊娠紋都無、望落去仲瘦左少少(心中暗喜)、奶奶仲煲好多湯水過我飲(老實講我阿媽都無咁有心機)。但麻煩既係對腳又痕又腫(腳腫都仲正常呀⋯腳痕就唔正常囉⋯要去睇皮膚科⋯用熱水泡腳加搽孕婦用藥膏)同妊娠糖尿(要去營養師Mimi度學習食營養餐,油同糖就一定唔食得⋯因為腳腫,連鹽都唔食得⋯)。

懷孕期我同吉豬爸都決定選擇順產,成日都聽到「順產對媽咪同BB都好啲」,再加上好姊妹第一胎用左4個鐘就生左個好可愛既B女,就決定於私家醫院順產。婦科時我睇開中環中匯大廈一位女醫生,當然產科都想搵番佢(我係十分喜歡同滿意呢位女醫生的!),但原來佢只掛港島區醫院,但我地心怡既醫院係一間位於九龍城既醫院,因為最近屋企,取捨後決定轉睇朋友睇過既尖沙咀區產科男醫生,並於懷孕24週時繳付醫院既留床位費。

超聲波、照結構一切正常,直到28週BB未轉頭,男醫生已預告如果bb仲唔轉頭,就要預約開刀。30週再照,未轉頭;32週再照,都未轉頭;鐵定要預約開刀唷(萬一隨時作動,兩母子都有危險)!

228299128

開刀日子只有五天選擇(不能太早又不能太遲:如太早出生,BB器官未完全成熟;如遲遲都未開刀,BB腳仔向下但又作動既話,媽媽可能會導致流血不止而BB出唔到黎會窒息),我地攞住呢五日去搵師傅擇日同擇時辰。結果係⋯呢日都唔五日都唔得,要再早一日既中午時份先係好,其他都係「差」!

我地嘗試透過尖沙咀區嗰間診所預約已留床位嗰間醫院既開刀服務,可惜太遲預約既關係,已經無日子無時間可選擇。診所姑娘亦無耐性回答我地更多既問題,並代醫生直接拒絕所有非一般既開刀時間(呢間診所因非常受歡迎既關係,縱使媽媽們已預約,但每次產檢都要等約一至兩小時,所以姑娘們都好忙,同時間佢地又好好人)。我地唯有尋求其他醫院睇下有無其他時間可以安排開刀,可惜另一家九龍塘區既醫院都好受歡迎,並且要交留床位費先會回答可選擇既開刀時間,所以直接放棄了⋯

糾糾纏纏已經34週,膽粗粗之下打電話俾之前中環區嗰間婦產科診所,留言後收到護士回覆既電話,因太灰心失意,我第一句就話:「算啦,都係無野啦⋯」,但之後佢話⋯

「唔怕喎,你話我知,可能我幫到你呢。」

「BB無轉頭⋯依家要開刀⋯但擇完時辰之後指定要xx月x日中午⋯」

「我依家check左醫生時間先,再問埋Matilda同Canossa睇下佢地呢段時間O唔OK,我check完再打番俾你,好無?」

當時我心諗,點解呢間診所可以咁好,因為一個電話就幫我做咁多野,真係超感激!(心裡淌淚⋯)

 

1048760921

 

不出一個下午就有好消息,醫生OK明德醫院又OK,收到明德醫院電郵即刻交留床位費,吉豬爸同我終於放下心頭大石。

開刀日為懷孕期既37週3,因呢個週數吉吉豬唔算好成熟,女醫生建議打2支皮質類固醇,之後就開開心心等開刀日啦~

為左可以盡量陪吉吉豬多d,我安排左自己生之前嗰日先開始放產假,十星期既產假都係陪住吉吉豬!

 

 

Text & Photos : 吉豬媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道