【初生嬰兒用品去邊買至抵？新手媽推介3間平靚正嬰兒用品鋪頭】

做左媽媽之後，真係慳得一蚊得一蚊，要做一個精明既媽媽，除左要確保買既品質之外，仲要又平又靚！買BB野真係會燒左好多錢，所以我平時買野之前都會花d時間格下價，務求買到性價比高既用品！以下呢3間都係我平時去開買野既鋪頭，有online shop，亦有實體店。

1. BB Baby 嬰幼兒童用品

首先講左Online Shop先，一向Made In Japan既野都會令我好放心，佢地主要賣母嬰用品，d貨都係來自世界各地，亦提供日本連線。仲會有好多小朋友既玩具、藥妝賣添！平時都有留意開賣日本嬰兒用品既Facebook Page，賣既價錢都好貴。不過呢間既價錢相對比較平，仲要買到日本貨。真心抵啊！

呢個3層奶粉格同奶咀夾埋100蚊都唔洗！

而呢一set Hello Kitty 初生嬰兒套裝都只係179蚊，入面有3條紗件、1件和尚袍、1件蝴蝶衣、1條口水肩同1對手套仔。Hello Kitty完全係心心眼，岩晒比個囡用！

佢地仲有好多小童裝既衫、外套、睡衣賣，價錢比起去日本Supermarket平好多添架！

BB Baby 嬰幼兒童用品：https://www.facebook.com/bbbabyhk/

2. BB超市

呢一間係一間實體店，好似特賣場咁。間鋪有好多唔同年齡既BB衫賣，好多都好靚料架，例如mides、Next等等，不過佢地主要係賣貨版／輕微既次貨。不過價錢就真係好平好抵買，要買初生BB衫就一定要去呢到買。因為初生BB大得好快，好多時都唔需要買太貴既衫仔，d錢留比佢大定dd個陣先買貴d都唔遲！

呢件咁lady既少女連身衫好似都係$50-60左右。不過好多時都係得一兩件，要慢慢揀下。

呢張被仔都係$60左右架咋！

除左衫之外，BB頭飾、口水肩、紗巾等等，都會有得賣！如果大家都去呢到買野，買之前要望清楚d衫仔有無污穢，始終都係貨版多～

地址：旺角道30號寶安大廈12樓（咩室我唔記得左喇，但就係一出Lift既右手邊就會見到，去之前打個電話問下啦;)）

3. BabyOnlineHk.com

第3個心水就係有Online Shop，亦有門市可以去。呢個賣好多嬰兒清潔用品、Cream、哺乳用品等等，總之你想買既用品都有機會搵到！而且多買又會平多d。係生BB之前，我都係呢到買左好多嬰兒洗衣液、濕紙巾、乳墊等等。價錢我睇左幾間，呢一間都算係好好好平既一間黎！

網址：https://www.babyonlinehk.com/home

呢3間都係自己私心推介，以我所知都係好平好抵買，如果大家都有其他好平既鋪頭不防都介紹下比我啦！

Text & Photos : 90後P牌媽媽
【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！