【網上學習】老師致電投訴小朋友上Zoom唔專心 港媽大呻無辦法遭網民轟唔盡責

【網上學習】老師致電投訴小朋友上Zoom唔專心 港媽大呻無辦法遭網民轟唔盡責

mami熱話 親子新聞
By Louisa on 01 Mar 2022
Digital Editor

疫情下家長和小朋友留家困獸鬥,當中子女上網課唔專心的問題,成為不少家長的困擾。不過小朋友上堂發白日夢、坐唔定,究竟是家長還是老師的責任呢?有港媽日前在網上大呻,稱老師每每致電,都是投訴其小朋友上網課時的行為問題,令她有感學校「成日都將教小朋友嘅問題踢返俾家長」,不過其言論卻惹來網民轟她不負責任。

港媽屢收老師投訴小朋友上網課唔專心。Photo from MamiDaily

老師致電投訴小朋友上堂唔專心

該名港媽日前在Facebook專頁「生仔要考牌系列」投稿,指近日無論任教哪一科的老師打電話給她,內容總是跟她投訴其小朋友上網課時的各種問題,「例如話佢唔專心、成日熄咗個cam,再唔係就連聲都熄埋、又唔答問題走咗去。」她又列舉了一段時常出現的對話:
老師:「家長,你有無辦法令佢專心?」
我答:「無」
老師:「你要諗下辦法」
我答:「除非面授課程,否則無。我要返工。」
老師:「其實係咪我哋唔識教?」
我答:「唔好意思,老師我無辦法,我已經放棄」
老師:「好啦,我已經話咗佢上堂嘅情況俾妳知啦」

老師要求家長,協助小朋友專心上課。Photo from MamiDaily

學校將小朋友問題歸咎家長

港媽嘆面對此情況家長也無可奈何,她認為疫情以來「成日都將教小朋友嘅問題踢返俾家長」。她指出學校曾說「唔好俾咁多電子毒藥佢」,會令小朋友集中力下降,然而現在無論做功課還是上堂都要用到電子產品,認為這是自相矛盾。

在職家長難做「書僮」看管上課孩子。Photo from MamiDaily

在職家長難做「書僮」管好小朋友

眼見孩子由K2至今,不停「上上下堂就變Zoom」,她反問「點教一個小朋友習慣坐定定上堂?」港媽又表示不否認會有好聽話的小朋友,但若然學生沒有家長做「書僮」,不能時時刻刻陪伴、指示他們「做呢樣嗰樣」,如此家長除了「打佢、罰佢,係可以一時三刻聽下話」,都沒有其他辦法了。

廣告
廣告

港媽又希望各位老師諒解需要工作的家長,真的沒有時間顧好小朋友的上課狀況,且「唔識做老師做嘅嘢」。她逐向網民詢問意見,「如有教育好方法嘅,請指教一個家長如何令一個小朋友聽話咁上Zoom堂」。

網民斥港媽將教養責任全交老師

帖文引來不少網民斥投稿的港媽推卸責任,「學校嘅角色係教育,家長嘅角色係教養,呢位家長返工係攰,但教導好小朋友真係好需要家長同老師嘅配合」、「點解我睇完既感覺係『家長將教小朋友既責任交晒俾老師』」、「都幾搞笑,使唔使個老師上嚟你屋企開Zoom啊?」、「老師已經盡責任同家長報告你小朋友上堂情況,你唔使對你小朋友負責?」

家長認為小朋友在家學習,自己有心無力。Photo from MamiDaily

家長網民嘆爸媽有心無力

也有人認同小朋友在家上課家長有心無力,「用過好多方法,傾計、鼓勵、獎勵、話、鬧都係咁......有時嗰種無力感大到想喊」、「K2學生嘅家長表示如果我有時間同心機搞得掂個小朋友,我就唔會上你個爛鬼Zoom啦」、「一切都答老師『我知架喇,由佢啦』」。

老師應有能力吸引學生上堂

不過亦有家長認為即使是上網課,課堂質素和秩序確是老師的責任,「大部分Zoom都好悶,無小組活動、無手作體驗,變成非常單向的教學。家長角色固然重要,但課堂有冇吸引力,燃唔燃點到小朋友的motivation就係老師責任」、「我經驗係,如果老師嘅class management做得好,班入面幾活潑嘅小朋友都可以好受控的。我諗家長同老師雙方都要好好諗下點樣先可以maximize到學習成效」。

Text:Mami Editorial
內容由「生仔要考牌系列」授權轉載

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道