【從職場女強人變為全職媽媽望能見證小孩既每個重要時刻】

By 傑。斯與晴 on 07 Mar 2018

以前既小JM媽係職場上既衝鋒者，喜歡接受新挑戰、新事物, 同時亦享受挑戰帶來既成功感、成就感。

在職時, 小JM媽亦曾經試過放棄安穩工作繼而轉戰一間剛成立既公司, 擔當別人口中稱之為「開荒牛」既角色,見證公司由最初只得我同老闆二人變成二十幾人既中型公司。記得當時身邊既朋友們都認為我既決定係錯,但當公司開始越見成功後, 再次加強左我既信心,證明自己當初既決定係岩既, 亦證明左自己既實力。

無錯, 我決定。辭。職! 決定要跳出職場, 成為一位「新手全職媽媽」。(各位全職媽媽多多指教!)

其實呢個念頭早係小JM出世後已經有,特別係眼見小JM日漸長大,不禁又再勾起左想辭職既念頭,真係令人覺得好掙扎好懊惱。說到底, 小JM既成長就只得一次, 錯過左就無架啦。身邊既朋友及親友們各有支持及反對,更提出不少問題, 希望我地可以認真考慮再作決定。有意成為全職媽媽既靚媽們不妨參考再加以考量喔。

1.) 放棄現有工作成就而辭職湊B 值得嘛?
好多朋友都問我值唔值得，當然總會有啲唔捨得, 同時亦會擔心能否適應,但一諗到可以陪著小JM成長及親自教導就覺得抵返晒。其實小朋友對爸爸媽媽既依附期係有限,到小B開始返學識左新朋友就會慢慢減少對爸媽既依附度,所以小JM媽都希望可以趁小JM上學前多花一啲時間去享受與小JM二人既親子時光。俗語有云「此刻無價」, 所以並無話值得與否, 始終每個人心內所想既都唔一樣。

2.) 同老公係咪已經有共識?
在職媽媽要決定辭職轉為全職媽媽實在唔係一件易事,需要兼顧既事情亦唔少,如果能夠得到爸爸既支持及鼓勵，相信足以增加媽媽既動力。幸好小JM媽都得到爸爸既支持、鼓勵，否則我應該無咁大勇氣踏出第一步。

3.) 家中少左收入真係可行嘛? 不會有影響嘛?
講到錢又係現實與理想既局面,家中少左一份收入, 自然錢銀就無咁鬆動,但只要安排得宜, 應花則花, 應慳則慳既話亦無不可。當然, 係下決定之前亦要同爸爸商量及預算一下日常開支,好等大家都有一個大概既收支預算。

4.) 你可以湊足全日並且忍受小孩哭鬧嘛?
我相信自己可以為小JM付出更多, 要湊小孩一整日我亦試過,可能接著落來要面對既係小JM 「Troble 2」既難題,希望我可以搵到平衡點KO 「Troble 2」!

5.) 外傭或長輩湊唔係已經可以嘛?
如果爸媽二人都要上班, 而家中又無長輩可幫忙湊小朋友的話,聘請外傭亦都係一個選擇。但因為連翻聘請既姐姐都無太大幫助,反而令小JM三翻四次因姐姐大意及疏忽而受傷,而且姐姐亦無在事發後通知我地, 所以真係放心唔落。雖然有啲朋友會提議搵長輩湊, 但真係唔忍心要長輩勞累,始終小JM已經日漸長大, 要花既體力亦不少呀。

6.) 點解要做全職媽媽?
最主要係想睇著小JM成長, 陪著小JM一齊係追跑跌撞既過程中成長,希望見證著小JM既每一個重要時刻;再者就緊係想花多啲時間俾屋企人, 可以有更多時間去照顧家人既起居飲食,可以煲多啲湯水俾家人飲添。特別係小JM既飲食, 因為之前姐姐有太多野都唔煮俾小JM食, 成日同小JM講唔好食,令到小JM出現左偏食既行為, 所以需要花時間去糾正返先得。除左以上兩點外, 其實最重要係可以多啲時間去教導小JM與人相處及待人既禮貌,因為管教都係必須既一環。

當全職媽媽絕不是一件容易既事,上至起居飲食, 下至家事及管教小孩,所以真係不得不佩服全職媽媽既體力及能力!希望我都可以成為一個合格既全職媽媽啦!

媽媽當自強。逸事分享:
當全職媽媽十日未夠已經遇上一個新挑戰：寒流＋雨天下買餸！

以前來講覺得落雨買餸無咩特別，但做咗全職媽媽之後，無人幫手湊小朋友個陣要帶B去買餸就變得唔容易！平時好天去買餸我頂多帶兩個大環保袋去裝餸，方便留返隻手拖小JM，因為出車去街市都唔方便，有時仲會俾人眼望望或有說話聽，所以盡量我都會想拖住去就算。但因為落大雨又天氣凍，要真係要出動到B車先得！以前一直都認為自己一個帶小JM 出街會好難，因為怕難以兼顧小JM同架B車，但當成為咗全職媽媽後發覺真係好多嘢都變成「有可能」。甚至可以單手抱小JM，再另一手拎袋＋B車行上幾層樓梯都一樣無問題。