【要買咩？大約幾錢？新手媽媽必看的BB用品清單】

各位準媽媽在BB出世時一定有好多野要準備！為左唔好有咩甩漏，我一早就結合左幾位台灣同香港blogger既清單~大家一齊睇下要準備啲咩啦！

每一樣用品都有平有貴，大家跟返能力同自己既意願買就ok~我就只係分享一下我自己買既野，無話好定唔好既 :)

#BB床 - Combelle
本身想買Stokke既BB床，雖然價錢比較貴，但因為太靚所以都覺得ok~點知，我見到Stokke送左張床仔俾一位男明星~由於我同老公都唔鐘意嗰位男明星，所以我決定轉軚！揀呀揀，最後我地揀左法國製造既Combelle~ Combelle BB床有好多色，最後揀左啡色，襯返屋企~價錢又平一半！(一set連床褥好似$4000)一樣都可以用到3、4歲~

#BB床褥 - Candide
同Combelle BB床都算係一set~加左$300 upgrade~Candide有2面，一面for初生，另一面for 10kg以上既~

#BB床上用品 - Candide
雖然肚入面既係女仔，不過因為床仔係啡色，我都唔想揀粉紅色既床上用品，感覺上中性啲既色比較耐看啲~最緊要係Candide雖然貴過其他BB床上用品(好似$1600)，不過質地真係唔一樣，床圍都厚身好多~

#BB車 - Combi
本身對BB車我無乜要求，只係想要又輕又穩~款式都大同小異~點知老公公司就買左呢架超靚既Combi BB車俾我地！仲要係限量版，波點、間條完全係我杯茶！

#電動泵奶機 - Medela
助產師朋友話其實係有得租泵奶機，不過我打算可以的話會泵到6個月大，所以都係買啦~Medela呢個牌子係醫院使用既牌子，所以我都揀左~係台灣買比香港一田、sogo、BB展更平，不過就無贈品送，但送既贈品我又唔太啱用，所以大家自行決定囉~

#BB衫 - Uniqlo
之前有報告驗BB衫有無螢光劑，結果Uniqlo無~反而有啲貴價既牌子BB衫有，加上網上好多人讚Uniqlo質地都好好，所以我就主攻Uniqlo了~590 - 900円就有2件底衫仔~面衫仔都係1290円起~香港就貴少少，但其實都平既~

#BB洗衣液 - Baby swipe
因為之前睇過一個video比較過幾個牌子既BB洗衣液，結果係Baby swipe洗得最乾淨同葉翠翠都推Baby swipe洗衣液，所以我都揀左 :p

#包被、睡袋 - Mides
Mides係有機品牌，款式都幾靚就買左lu~

#奶樽 - Nuk
Nuk的奶咀係比起日本牌子既奶咀難吮的！不過因為我想埋身餵人奶，所以唔打算揀好易吸吮既！太易吸吮到，BB就會揀用奶樽食而唔自己用力吸吮乳房食人奶~

#紅外線探熱 - Nuk
除左可以探體溫外，水溫都測到~特價後都只係$200唔洗~所以就買左lu~

#奶樽消毒機 - Nuk
之前見萬寧做特價！$300 only~雖然無溫奶功能，不過其實用熱水座熱樽奶就得，無溫奶功能都無乜所謂~最緊要夠快又夠乾淨地消毒到就ok~

#BB背帶 - Todbi
呢個係老公揀既！佢話BB出左世後主要佢揹，所以就俾佢揀~基本上款款都一樣樣，我本身打算叫佢揀款靚既就得，點知我老公好有要求！話一定要有氣墊，因為唔想俾嚿膠壓住盤骨 :p 話有氣墊舒服好多，所以就揀左Todbi~特價時$1300，都唔太貴既~無氣墊既其他牌子我見最平係gmarket賣$7xx :)

#嬰兒濕紙巾 - Mannings
只要係純水配方，口仔都抹得就ok~萬寧牌又平過Huggies~所以就揀左Mannings牌lu~

#嬰兒棉 - 思詩樂
係陪月姨姨叫我買既~可以用黎抹下眼仔、咀仔~

希望今次分享既BB用品清單，可以幫到各位新手媽媽決定要入咩貨啦！

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！