【親子好去處】偽北海道旅行 元朗日本感農場 親手摘香印提子+白色苦瓜

估唔到喺香港都可以摘到香印提子 !!香印提子來自日本爽脆外皮，果肉大粒、柔軟多汁~農田打理得很企理，井井有條。小朋友如果想幫手摘(剪)提子，只要企上葡萄樹下嘅小山坡上就可以摘到。#自費活動 #非廣告 #真心分享

每磅香印提子售150元。
農場有提供位置俾遊人洗提子和坐底食。
農場仲有其他提子摘，如晚夏和巨峰，但我哋當日去時，農夫話冇得摘。

最後我哋摘咗一磅多嘅香印提子(230元)回家整雪條。
(其實剪咗一紮已經係一磅多，所以只係摘咗一次)
不過係葡萄園影相打卡 又真係幾靚~~

摘完提子，我哋去隔離摘(剪)白色苦瓜。
由於生得較高，要大人先摘到，小朋友睇住先。
每斤售20元。
我哋摘兩條，剛好20元。
回家煮咗苦瓜炒蛋，好味啊。

喺龍眼樹下，
有一個釣魚池。
30元玩10分鐘
小朋友利用釣魚工具任釣魚玩具。玩完仲有水果填色紙送。(延伸學習)
另設手工藝工作坊，大約80元整一件手工，我哋冇參加。

一大片草地任跑，
亦見到有小朋友係度玩吹泡泡。
旁邊仲有水稻 ，
打卡幻想自己喺北海道 。

餵羊羊
10元一札飼料
仲有小狗同豬豬睇~

後記

農場算幾大，
摘農作物時，側邊都有樹蔭，
所以唔太辛苦。
農場亦有提供有遮蔭嘅座位俾遊客坐底食水果或香草炭燒雞(150元1隻)。
餵羊和玩釣魚嘅部份地方有遮蔭。
如果要摘農作物，要先到收銀處問職員拿用具。
但有時人多員工少，未必咁快拿到用具。
農田外嘅農夫只懂講普通話，有問題可能要問返收銀處嘅員工。
農場內只得一隻羊，由朝俾人餵到晚，所以未必肯進食飼料，而且也可能吃太飽。如果晏咗入到去，建議去睇吓羊好了~
農作物逐磅收費，不要忘我瘋狂採摘。
請做足防曬和防蚊功夫。

朗屏士多啤梨葡萄園

地點：元朗大棠路大棠村
電話：9251 8926
開放時間：星期一至日 08:00－18:00
收費：免費入場費，摘水果需逐磅收費，巨峰$90/磅、香印$150/磅

前往方法：

西鐵朗屏站B2出口出，轉乘K66接駁巴士到大棠山迴旋處巴士站落，行入大棠村牌坊，喺籃球場右側行，步行約2-3分鐘。

建議去前查詢，以免失望而回
當日(25/7)去，唔多人，但每日情況不同!!
不用預約，所以不清楚佢哋有冇人流管制
(歡迎友善地匯報最新情況和更正資料，謝謝)

延伸閱讀：
【親子好去處】最平$90一家四口辦通行證 多個博物館全年任睇任玩

延伸閱讀：
【親子好去處】日式公園賞火紅杜鵑花 單車公園之櫻花樹下 海傍漫遊+水池睇龜+草地放電

延伸閱讀：
【親子好去處】$38包睇戲+室內遊樂場+兒童圖書館 不足一米免費入場睇新片

Text & Photo : 龍鳯孖媽