【帶小朋友去剪頭髮迎新一年 平民價小型賽車場髮型屋】

農曆新年就快到，除左大人要剪返個靚髮過年，小朋友都一樣要，但大部分小朋友都好怕剪頭髮，通常都會喊。但偏偏芊嶠由細到大都肯比人剪頭髮，無論係識唔識都好，佢都會肯剪，雖然都有扭計嘅時候。就係前排，比嶠媽發現左一間新開嘅單剪髮型屋，單剪同快剪唔同，快剪用5-10分鐘就剪好一個頭，單剪係好用心去剪每一個頭！髮型屋位於新蒲崗，好近嶠媽屋企，鑽石山地鐵站行去都唔算太遠。

講返先，一入到髮型屋，就見到有兩架車車，係比小朋友坐係上面剪頭髮架！係咪好型先？

而且兩架車車前面，都會有唔同主題嘅貼紙，仲有兩款唔同公仔嘅鏡添！芊嶠都覺得好吸引！

因為係單剪屋，如果去到遇到有小朋友剪緊，咁哩個時候就可以玩住等啦！店內有個小型賽車場，有兩架米奇老鼠電單車，等小朋友可以一路玩一路等！仲有紅綠燈，令小朋友更投入，仲有幾個街名貼左係牆，真係好似係街到揸車咁！

就係哩兩架米奇老鼠造型電單車，係咪好正先？男仔同女仔坐上去，都立即變成賽車手；仲有哩架綠色跑車，但壞左，咁就上去影返張沙龍啦！睇下劻霖幾認真咁擺pose！

芊嶠選左白色跑車，坐上去，之後披上一張好大張嘅剪髮巾，塊巾仲可以包埋架車！嶠媽覺得有樣野好特別，你地見唔見到巾中間有個透明位？小朋友手仔係入面可以揸住呔盤，透明果個位可以望到架！髮型師哥哥好細心咁幫芊嶠剪頭髮，剪完就算吹頭，芊嶠都冇有怕！

一時又話要關跑車門，一時又話要落去揸電單車，哥哥想幫佢影張靚相都唔肯望鏡頭！講返，芊嶠哩個冬菇頭，顯得佢好可愛，成日好想笑佢，太可愛了！剪完唔洗即刻走架！可以再去賽車場到揸返幾轉再走都得！

另外，如果小朋友唔玩車車或唔坐車車剪髮，不論男女老少，都只係$60。但如果要係兒童專區剪髮，包括坐車車剪和玩車車，咁就要比$80架啦！而且只限130cm以下小朋友咋！

**星期六、日，公眾假期可能會較多人，可以的話先預約，會比較好。
================================
One Quick Trim 單剪屋
分店地址：九龍新蒲崗爵祿街21號地下 (可立中學旁，華潤超市隔離)
營業時間：10:00am – 9:00pm (星期一至日)
Whatsapp：6656 2322

Text & Photos : 嶠媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！